Bermeok irabazi du Kontxako bandera
Bermeok irabazi du bigarren jardunaldia eta Kontxako bandera, Hondarribiari 6 segundu ateraz. Hondarribiak inork nahi ez zuen lehen kaletik egin behar izan du arraun.
Inork ez zuen lehen kalea nahi, eta Hondarribiari egokitu zaio. Zama horrekin bogatu du Ama Guadalupekoak gaur Kontxako estropadako bigarren jardunaldian. Urdaibaik, aldiz, laugarren kaletik egin du arraun. Alde ikaragarria egon zitekeenik ez zirudien, baina gerora ikusi da lehen kalearen beldur izatearen arrazoia, Hondarribiak ezin izan baitu olaturik hartu bueltako bidean.
Hasieratik erakutsi ditu hortzak Bermeok, eta ia hasieratik geratu da atzean Hondarribia, denboraldian lehen aldiz Orio eta Kaikuren atzetik. Hala ere, joanekoan aldeak ez dira handiak izan, hiruzpalau segundokoak gehienez. Oriok bizkaitarren erritmoari eutsi dio, eta balizara aurretik iritsi da (9:44). Bermeok segundo batera egin du maniobra, hirura Hondarribiak eta Kaikuk laura. Lan erditan, lehen jardunaldiko abantaila janda zuen Bou Bizkaiak.
Olaturik ez bueltatzeko
Ziabogara azken tokian iritsi arren, maniobra bikaina egin dute berdeek eta Urdaibairekin ia parekatuta hasi dute bueltakoa. Baina lehen olatuak erakutsi du kaleen arteko aldea bazegoela. Berrehun metro egin orduko Hondarribia atzean geratu da berriro, laugarren tokiraino jaitsiz. Ondoan Kaiku zuen, urteko estropada onena eginez, eta horrek ez dio mesederik egin Ama Guadalupekoari, kale hobeagoen bila joateko aukerarik ez baitute izan.
Gauzak horrela, Bermeo tartea irekiz joan da, 10 segundokoa izateraino. Berdeak olatuaren zain egon dira, baina lehen bi kaleetatik ez da asomatu ere egin. Hala, irla parera iritsi direnerako Bou Bizkaiak poltsikoan zuen bandera, Hondarribiari 9 segundo ateratzen baitzizkion.
Badian Ama Guadalupekoa indartsu azaldu da, dena emanda, baina Bermeok eutsi egin dio, lehen jardunaldian egindako lan bikaina berretsiz. Azken paladetan Hondarribiak bigarren postua lortu du, Orioren aurretik sartuz, baina Bermeok baino 6 segundo eta erdi gehiago behar izan du helmugara iristeko.
“Porrota ez, pena bai”
Estropada bukatuta buru makur azaldu da Ioseba Amunarriz hondarribiarren patroia, kopetilun, baina gustura egindako lanarekin. “Porrot handia ez, pena bai. Porrota izango zen urte guztian ez ibili izana. Ehuneko ehuna atera behar zen, ez da atera eta listo”, esan du. Kale zozketagatik galdetu zaionean, kiroltasunez erantzun du hondarribiarren patroiak: “Kontxarako zortea behar da, baina kalea ez da aitzakia izan behar, Urdaibaik garaipen handia lortu duelako”.Kontxako Bandera. Sailkapena orokorra
- Bermeo: 38:35,30
- Hondarribia: 4,88ra
- Orio: 19,46ra
- Kaiku: 21,22ra
- San Juan: 41,68ra.
- San Pedro: 1:04ra
- Tiran: 1:16ra
- Donostiarra: 2:02ra
