Maider Ugarte Garbizu: "Begiradak"
Irunabar Irungo Bertsoaren Bilgunearen eta HITZAren elkarlanaren harira, Maider Ugarte Garbizuk bertso sorta egin du. Hona hemen Ugartek egindakoa:
1.
Gure izatearen ispilu
begiradak du salatu
Nahiz eta guk bi begi ditugun
hamaika begiratu
horietako batzuk bakarrik
nahi nituzke nik aipatu
Hitzak asko esaten du, baina
begiekin ezin lehiatu
2.
Begirada honek lan zehatz bat du
egitea gorputzen ruta
Maiteminduta nagoen arren
ez nago bate minduta
Asko da berak lortzen duena
laztanez eta musuka
elikatzeaz gain norbera
osorik jaten gaitu ta.
3.
Kezka, animo, harrotasuna
dabil begietan gora
tristurak eta abenturaren
kitzikak egin dute topa
nire guraso zoragarriak
arren, ez zaitezte zora
Ameriketara noalako
ni naizena dadin lora
4.
Sekretu hau guk biok dakigu
Benetan diotsut, zinez
Sekretuaren jabe bakarrak
garela dezagun sinets
Sekretuaren konplize gara
irri murrixka eginez
ezpainetan erre egiten du
eta begietatik ihes
5.
Bihurrikeriz bihurrikeri
lau urte ditut ospatu
gurasoei ez zaie gustatzen
niretzat ez da bekatu
Estrategia paregabea
dut nik nahi dizut aipatu
begiratzen ez baldin bazaitut
hemen ez da deus gertatu
6.
Jende batek dio argazkiak
gaituela barrutik husten
Tripa sartzen dugun bitartean
saiatu titiak puzten!
Batzuk oso guapo ta besteak
ez dira ondo ikusten
argazkiak ez du benetako
begirada erakusten
7.
Ispiluak ez dio gezurrik
ezkutatzen ez saiatu
argi erakusten du daukazun
hainbat motxila ta zaku
baina ez da bere errua ta
egin behar diozu barkatu
parean duzun hori zu zara
beraz, goxo begiratu
8.
Kaletik zu ikusi ta elkar
saiau ginen ekiditen
baina elkarren kontra gentozen
ezin atakatik irten!
Agurtuko ote nau, ai ama
barrua nuen irakiten
hurrengoan hobeto saiatu
ostrukarena egiten!
9.
Larunbat gaueko kontzertuek
egiten dute lagundu
alkohol eta kearen artean
elkar begiratu dugu
misterioa, kitzika, garra
gorputzean gora ditugu
Bukatu da, argiak pizturik
xarma guztia galdu du
10.
Gaurko azterketa gogoratzean
esan duzu zuk: «la merde!»
Ondokoak zer idatzi duen
ikustea duzu xede
Disimuluaren erregea
zara zu, bai, alafede!
Denok kopiatu izan dugu,
ez zara hain errebelde!
11.
Begirada hotza, gogorra da
denok in dugu bekatu
Polizia eta eskanerra
ezin dira maitatu
ez dut ezer txarrik egin baina
inork ote nau salatu
oso deseroso nago eta
mesedez, ez begiratu! ditut akaso!
