Adrian Arruti Bernadet: 'Zaldunborda'
Irunabar Irungo Bertsoaren Bilgunearen bertso sorta
Irunabarren eta HITZAren arteko elkarlana, abian
Irunabar Irungo Bertsoaren Bilguneak eta OARSO BIDASOKO HITZAk elkarlanerako bidea zabaldu dute. Goialdean dagoen bertso sorta horren hirugarren emaitza da. Elkarlan horren arabera, hilabete guztietako azken ostiralerako Irunabarreko kideek bertso sorta egingo dute, eta HITZAk hori publikatuko du. Hirugarren honetan, Adrian Arruti Bernadet arduratu da ekarpena egiteaz. Doinua: ‘Komeni zaigun ixtoria bat (A)’
Zaldunborda
1.
Bere garaian erraustegiaz
jarri gintuzten jakean,
orain saltoki handi batekin
hasi dira atakean.
Jaurlaritzaren mugatze lege
handienaren atean
dena lotuta utzi nahi izan
zuten uda gau batean.
2.
Iluntasun ta alebosiaz
batzuen kudeaketa
bikaina denez, zertarako gu?
Zertarako zundaketa?
Zaldunbordako gainean egin
nahi dute makro outleta
eskualdeko merkatariek
baliorik ez dute ta.
3.
Haien eredu jasangarria
zabaltzen alderik alde
aritu arren diskurtso hori
ez da izaten debalde
azpiegiturez suntsitzen dute
izaki zein mendialde
gero haritz bat landatzen dute
ekosistemaren alde.
4.
Hainbat alderdi bihurtu ohi da
horrela progre nahiz eko.
Makro outletak bertute asko
omen dauzka banatzeko
prest daudelako hainbat lan duin
hiltzera kondenatzeko
Beraien ordez beste bi mila
duingabe eratzeko.
5.
Lanen baldintza duin gabeaz
sarri dut hitz jarioa:
Euskal Herriko beharginek maiz
dute sufrikarioa.
Berrogei lagun hil dira aurten,
nolako kalbarioa!
Sarri lan batek bihurtu ohi du
bizitza prekarioa!
6.
Behar denean behar duenak
gaitzari eginez uko
esperantzaren berdea erraz
bihurtu izan du luto.
Sortu ditzaken ezbehar denak
izanagatik gertuko
gure odolak ez dio inoiz
arropa zipriztinduko.
7.
Norbanakoak ez du indarrik;
ez botereak adina
guk Zaldunborda Gelditu dugu
borroka ildo egina
batu zaitezte plataformara
ez da erronka arina!
Honek guztiak Bidasoaz gain
daukalako eragina.
