Grebara deitu du Bidasoko Kontseilu Sozialistak
Pikete informatiboak egin dituzte goizean goiz Irun eta Hondarribian. 11:00etan, baina, Donostiako Bulebarrean elkartzeko deia egin dute.
Lanbide arteko gutxieneko soldata propioa 1.500 eurokoa eskatzeko greba eguna da gaur, hilaren 17a. Bide horretan, Kontseilu Sozialista azken asteetan prestatzen aritu denak argia ikusiko du gaur, Donostiako Bulebarrean baitu hitzordua antolakunde sozialistak, goizeko hamaiketan.
Hala ere, sare sozialen bidez jakitera eman dutenez, pikete informatiboak egin dituzte goizean goiz: 06:30ean Irunen, eta 07:00etan Hondarribian, hain justu.
Era berean, diote hainbat direla Kontseilu Sozialistak gaurko egunean mobilizatzeko ematen dituen arrazoiak. “Lan eta bizi baldintzen okertzen bat bizitzen ari gara, hala nola, soldaten beherakada, etxebizitzaren negozioa eta zerbitzuen kaskartzea. Horren aurrean, pertsona guztientzako kalitatezko bizi baldintzak bermatu behar dira”.
Horretaz gain, baina, salatu dute “kontrol eta errepresio handia” dagoela, “estatuak eskubide politiko eta zibilak murrizten ari baitira”.
Eta, azkenik, “ofentsiba inperialistaren aurka ateratzea” aldarrikatu du antolakundeak, berrarmatzearen eta langile klaseak ordaintzen duen suntsiketaren aurka, alegia.
Ildo horretatik, nabarmendu dute gaurko eguna “garrantzitsua” dela “borrokan sakontzeko eta langile klasearen antolakuntza hedatzeko”.
