Txenpereneako kirol azpiegituraren eredua hitzartu dute
Udalak eta aldundiak akordioa lortu dute Txenperenean eraikiko den azpiegitura berriak hartuko duen kirol programaren inguruan, instalazio horien erabiltzaile diren kluben beharretan eta eskaeretan oinarrituta.
Irungo Udalak eta Gipuzkoako Foru Aldundiko Kirol Departamentuak akordioa lortu dute Txenperenea eremuan eraikiko den azpiegitura berriak hartuko duen kirol programaren inguruan, instalazio horien erabiltzaile diren kluben beharretan eta eskaeretan oinarrituta. Cristina Laborda alkateak eta Goizane Alvarez Kiroletako foru diputatuak bilera batean eman dute akordioaren berri. Haiekin batera izan dira Roberto Ramajo aldundiko Kiroletako zuzendaria, Borja Olabazal udaleko Kirol zinegotzia eta Bidasoa Atletiko Taldeko eta Txingudi Errugbi Taldeko ordezkariak.
Aldundiak eta udalak kirol instalazioak berreraikitzeko baldintzak hitzartu dituzte, azpiegitura berriaren ezaugarriak zehazten dituen kirol plangintza batean oinarrituz, instalazioak erabiltzaileak atletismoan eta errugbian egokiro aritzeko eta erakunde eskudunek homologatzeko modukoak izatea bermatzeko.
Kirol programa horrek atletismo estadio bat eta errugbi zelai bat egitea aurreikusten duela adierazi dute ordezkari politikoek, biak ala biak ziurtagiri ofizialerako beharrezkoak diren arauzko dimentsioekin, bi kluben eskaera historikoei erantzunez.
Atletismoko pistak 400 metro luze izango ditu, eta 100 metrotako probarako eta 110 metrotako hesi lasterketetarako erabili ahal izango da. Instalazioak, gainera, zortzi kale izango ditu eta berotzeko 500 metroko eraztun bat izango du inguruan. Errugbiko zelaiak, aldiz, belar naturalezko gainazala izango du. Atletismoko jaurtiketa probetarako ere erabili ahal izango da, eta beharrezkoak diren arauzko ekipamendu guztiak instalatuko dituzte, hala nola, oztopo lasterketetarako erreka, jaurtiketak egiteko kaiola eta salto probetarako eremuak. Eraikin bakarra harmailak izango dira, eta, azpian, erabiltzaileei zerbitzu egiteko eremuak eta entrenatzeko lekuak jarriko dituzte.
Instalazioen azalera eraikia 3.600 metro koadrokoa izango da, eta 800 lagun ingururentzako harmailak, kronometratze dorrea eta epaileen eremua hartuko ditu barnean. Horrez gain, entrenatzeko 1.800 metro koadroko eremu estali bat egingo da: pista, abiadura probak entrenatzeko 60 metroko sei kale, salto lehiaketak prestatzeko pasilloak eta jaurtiketak egiteko eremua.
Kirol ekipamenduen osagarri, eremuak aldagelak, komunak, gimnasioa, taberna, biltegiak, erabilera askotarako aretoak eta instalazioak behar bezala funtzionatzeko beharrezkoak diren azpiegitura teknikoak izango ditu. “Kirol ekipamendu moderno bat, taldeen eta herritarren beharretara egokitua”, esan dute ordezkariek proiektuaren gainean.
