Mehatxuak Emakumeen Etxeari
Posta elektronikoz mehatxuak eta gorroto mezuak jaso dituzte. Salaketa jarri dute, eta Ertzaintzak ikerketa abiatu du.
Irungo Udalak eta Emakumeen Etxea Elkarteak salatu dute posta elektroniko bidezko mehatxuak jaso dituztela Emakumeen Etxean. “Jasotako mehatxu eta gorroto mezuen aurrean gaitzespen irmoena adierazi nahi dugu”, esan dute. Horregatik, atzo, emakumeen babeserako eta ahalduntzerako espazioa itxi egin zuten, eta gaur (hilak 20, asteartea) dira berriz ere zabaltzekoak, “segurtasun neurri egokiak hartuta”. Atzo goizean mehatxuei aurre egiteko salaketa jarri zen, eta Ertzaintzak ikerketa abiatu du.
Azpiegituraren arduradunek barkamena eskatu diete Emakumeen Etxearen erabiltzaileei aldi baterako itxiera horrek eragindako eragozpenengatik, “eta berriz ere berretsi nahi dugu bizikidetzarekin, berdintasunarekin eta balio demokratikoen defentsarekin dugun konpromisoa”.
