Martxoaren 24an eta 25ean izango da 24. Korrika Irunen eta Hondarribian
Martxoaren 24 eta 25eko goizaldean Irunen izango da AEKren martxa erraldoia. Hondarribira martxoaren 25eko 05:17an iritsiko da.
Idoia Genua eta Mattin Sorzabalbehere, 2024ko 23. Korrikaren lehen lekukoarekin. 24. Korrikaren ibilbide zehatzaren berri eman du gaur AEK-k. Jakina zen martxoaren 19an hasiko dela Atharratzen (Zuberoa) eta Bilbon egingo dituela azken metroak martxoaren 29an. Orain, herriz herri zein ibilbide izango duen jakinarazi dute. Bidasoan bi egunetan izango da Korrika: Irunen martxoaren 24 eta 25ean, eta Hondarribian martxoaren 25ean.
Bitan pasako da Korrika Irundik. Lehenik eta behin, martxoaren 24ko goizaldean. Oiartzungo Gurutze auzotik sartuko da hirira AEKren sostengurako martxa erraldoia, 03:44an dira irundarrak lehen lekukoa hartzekoak. Hiria zeharkatu ondoren, Behobia aldera egingo du lasterkarien segizioak, handik Nafarroara sartzeko, Berara Bigarrenez izango dute aukera irundarrek, ordea, Korrikaz gozatzeko. Izan ere, martxoaren 25eko 04:57an berriz ere Behobiatik besarkatuko du hiria, hendaiarrek ordu horretan emango diotelako lekukoa han zain izango direnei.
Behin Irungo saihesbidea eginda, Hondarribia aldera joko du 24. Korrikak. Hiri harresitura iristeko ordua martxoaren 25eko 05:17rako ezarri dute antolatzaileek. Hondarribia pasa ondoren Oarsoalderantz egingo du bidea, Gaintxurizketan prest izango direlako lezoarrak egun horretako Oarsoaldeko lehen lekukoa hartzeko.
Jarraian, 24. Korrikaren ibilbide zehatza.
