Adinekoen zentro sozialetako taberna eta jangela zerbitzua, lizitaziora
Luis Mariano eta Iraso zentro sozialetako taberna eta jangela zerbitzuak kudeatzeko eskaerak aurkezteko epea zabaldu dute.
Luis Mariano zentroa. Argazkia: Google Maps. Irungo Udaleko Gizarte Ongizateko Arloak jakinarazi duenez, Luis Mariano eta Iraso zentro sozialetako taberna eta jangela zerbitzua kudeatzeko lizitazio publikoaren baldintzak argitaratu dituzte “zerbitzua bera eta garai bateko jarduna berreskuratzeko asmoz”. 2021ean amaitu zen aurreko kontratua, eta berria esleitu gabe geratu zenez, zerbitzua berpiztu nahi dute.
Enpresek zein profesionalek har dezakete parte lizitazio horretan, eta hilabeko epea daukate horretarako, urriaren 29ra arte, alegia. Aipatu dutenez, kanonaren tasa jaitsi dute, eta hilean behin zein abuztuan zerbitzua ixteko aukera ematen dute. Era berean, jakinarazi dute bi zentroetako sukalde eta jangeletako instalazioak egokiak direla, baina egokitu egingo dituztela “beharrei erantzun diezaieten”.
Esleipendunak 12:00etatik 19:00etara arteko ordutegia egin beharko du gutxienez, eta kafea, oinarrizko menua eta eguneko platera prezio jakin batzuetan eskaini.
