Elkarrekin Irunek "premiazko erronkei" eusteko eskatu dio udal gobernuari
Nabarmendu dute beharrezkoa dela, besteak beste, aparkalekuen eta mugikortasunaren arazoei heltzea edota tokiko merkataritza sustatzea.
David Nuño Elkarrekin Irun taldeko bozeramaileak berriki salatu du udal gobernuak lehentasuna ematen diola Via Irun edota erabilera anitzeko kiroldegia bezalako proiektuetan oinarritutako agendari; azpimarratu du proiektu horiek “hiriarentzat positiboak” direla, baina uste dute ez luketela ke lasterra izan behar “benetako arazo eta erronka premiazkoagoak estaltzeko”.
Nuño: “Beti egongo gara herritarren bizitza hobetzen duten proiektuen alde, baina arduraz jokatzeko ere eskatzen dugu. Gobernu honek bi milioi euro inbertituko ditu erabilera anitzeko kiroldegi berriaren proiektuaren idazketan, eta bitartean, hogeita hamar urte daramatzagu Plaiaundiko kirol instalazioek kokaleku berria izateko zain”. Gauzak horrela, bozeramaileak nabarmendu du Artaleku eta Azken Portuko kiroldegiek mantentze lanetan eta baliabideetan hobekuntzak behar dituztela “aspalditik”.
Ildo horretatik, taldeak deitoratu du erakundeen arteko lankidetzak proiektu horiei bultzada emateko balio izan duela, baina “osasunaren arloan, esaterako, urte luzeak daramatzagu lankidetza horrek emaitzak eman gabe”. Alabaina, diote legealdi hasieratik gobernu horrek “zailtasunak izan dituela gauzak aurrera ateratzeko”, eta berriki koalizio gobernu bat osatu duela “bere burua eusteko”.
Azkenik, Elkarrekin Irunek argi utzi nahi izan du “beharrezkoa” dela aparkalekuen eta mugikortasunaren arazoei heltzea, tokiko merkataritza sustatzea, auzoak biziberritzea, herritarren parte hartzea handitzea eta bizikidetza hobetzea. Baina, “legealdia amaierara hurbiltzen ari da eta dugu ikusten erronka horiek egungo gobernuaren lehentasuna direnik”.
