Sexu erasoa arbuiatu eta deitoratu du Irungo Udalak
Elkarretaratzea egingo dute gaur (hilak 26), 19:00etan, San Juan plazan. Herritarrei bertaratzeko deia egin diete.
Elkarretaratzea egingo dute gaur, 19:00etan, San Juan plazan. Hilaren 24ko egunsentian eraso sexista bat egon zen Irunen, eta horren aurrean adierazpen instituzional bat argitaratu du Irungo Udalak. Idatzi horretan zehaztu dutenez, argi utzi dute “guztiz” arbuiatu eta deitoratzen dutela erasoa, eta babesa zein gertutasuna adierazi dizkiela biktimari eta haren ingurukoei.
Zehaztu dutenez, udalak gertakariaren berri izan duen unetik “erasoari buruzko informazioa berretsi, egiaztatu eta zabaldu” ondoren, indarkeria sexistaren alorreko erakundeen arteko arreta eta koordinazio protokoloa aktibatu dute “bildutako informazioa baloratzeko eta koordinazioa antolatzeko, biktimari eta haren ingurukoeei arreta egokia ematen zaiela bermatze aldera”.
Eta honela jarraitu dute: “Irungo Udalak erabaki hauek hartu ditu: alde batetik, udalaren jarrera irmoa adieraztea, argi eta garbi esateko ez ditugula onartzen emakumeen giza eskubideak urratzen dituzten eraso hauek eta, bestetik, herritar guztiei bide bat eskaintzea indarkeriazko ekintza hauek arbuiatu ditzaten, erasotako emakumeek eta, azken batean, emakume guztien askatasunaren kontrako ekintzak baitira. Emakumeen kontrako indarkeriak erasotzaile eta biktima banakoak ditu, baina emakumeak kontrolpean eta mendean betikotu nahi dituen egiturazko arazo bat du jatorrian”.
Ildo beretik, azpimarartu dute indarkeria hori ez dela gertakari isolatuen emaitza, ez eta azalpenik gabeko ekintzen ondorioa. Hots, genero aurreiritzietan oinarritutako sozializazio baten ondorio larri eta lazgarriena dela diote. “Sozializazio horrek emakumeak desberdintasun materialeko egoera batean mantentzen dituen gizartearen antolamendu baten aldeko giroa sortzen du, eta horrela emakumeen bizitzak prekarizatzen dira eta ez dira aitortuak gizonen pareko herritar gisa, eta beren oinarrizko eskubideak baliatzeko oztopoak jartzen zaizkie”.
Era berean, nabarmendu dute udalak lanean jarraituko duela arazo sozial horri aurre egiteko behar adina neurri sustatzeko; “gure bizikidetza demokratikoaren oinarriei zuzenean eragiten dien arazoa da”.
Azkenik, udalak dei egin die herritarrei gaur (ostirala, hilak 26) San Juan plazan egingo den elkarretaratzera bertaratzeko, eta babesa adierazi die mugimendu feministak gertakaria deitoratzeko antolatutako ekitaldi guztiei.
