Osakidetzak haur eta gazteen psikiatria zerbitzua berrezarri du
Dagoeneko martxan dago zerbitzua. Era berean, jakinarazi dute eskualdeko lehen mailako arreta indartuko dutela familia mediku eta pediatrekin.
Bidasoko eskualdean haur eta nerabeen psikiatria zerbitzua martxan dago atzotik Irungo Osasun Mentaleko Zentroan Eusko Jaurlaritzako Osasun Sailak eta Osakidetzak abian jarritako estaldura zaileko EPEari esker. Hots, lehen mailako arreta indartuko dutela ere jakinarazi dute familia mediku eta pediatrekin.
Gauzak horrela, nabarmendu dute Bidasoko ESIa izango dela osasun langileekin gehien indartzen den eskualdeetako bat, eta “horrela Osasun Sailak herritarrei arreta hurbila eta kalitatezkoa bermatzeko duen lehentasunari erantzungo” zaiola.
Lehen zegoen profesionalak lekualdatzea eskatu zuen, eta hilabete horietan Donostiako Alde Zaharreko Osasun Zentroan eman diete arreta adingabeei “modu jarraituan eta gorabeherarik gabe, bolumen asistentzialari eutsiz eta baita areagotuz ere, eta horrela itxaronaldiak murriztuz”. Gehitu dute, bestalde, haurren eta gazteen osasun mentalaren arreta psikologo, erizain eta psikiatra profesionalek osatutako talde multidiziplinar batek ematen duela, eta Bidasoko eskualdeko haur eta gazteen psikologia zerbitzua eta erizaintzako arretak “normaltasunez” funtzionatu dutela aldi horretan. Hots, nabarmendu dute arreta hori “indartu” egin dela, “bereziki haur eta gazteen psikologia arloa”.
Irungo Osasun Mentaleko Zentroko lanpostua estaldura zaileko EPEan Euskal Autonomia Erkidego osoan eskainitako sei lanpostuetako bat da, “eta horri esker eskualdean bertan haurren eta nerabeen osasun mentalari arreta emateko funtsezko baliabide bat berreskuratu da”.
Azkenik, Osasun Sailak azpimarratu du “oso garrantzitsua” dela zerbitzua pazienteen ingurune hurbilean eskuragarri egotea. “Irungo jarduera berreskuratzearekin lehentasun bat bete da”.
