Handia egin dute Bixente-Atain eta Erika-Gisela bikoteek
Iragan ostiralean Hondarribia Grand Slam eta Master Serieseko finalak irabazi zituzten. Bi partidak oso orekatuak izan ziren eta ikuskizuna handia izan zen.
Hondarribiko Jostaldi pilotalekua txiki geratu zitzaien Bixente-Atain eta Erika-Gisela bikoteei. Handia egin zuten joan den ostiralean, Hondarribia Grand Slama eta Master Series Hondarribia txapelketak irabazita. Joko azkarra, jokalarien arteko konplizitatea eta ikuskizuna izan ziren gaueko protagonistak, harmailak goraino beteta zituen Jostaldi pilotalekuan.
Emakumeen finala jokatu zen lehenik. Erikak eta Giselak lehen set-a aise menderatu ondoren, bigarren set-ean arazo gehiago izan zituzten. Lur eta Laura erosoago aurkitu ziren eta momentu batean markagailua irauli egingo zutela zirudien arren, azkenean markinarrak eta kataluniarrak partidari buelta eman eta garaikurra bere egitea lortu zuten. 15-8 eta 15-13 bukatu zen partida.
Segidan, gizonen finalari ekin zioten. Gorrizko kamiseta soinean zeramaten Hormaetxea eta Bailo ziren finala irabazteko faboritoak. Izan ere, aurtengo grand slameko partida guztiak irabazi zituzten.
Partida hasterakoan, ordea, bi bikoteen arteko maila oso parekatua zela ikusi zen. Jostaldi pilotalekuko ezker harmaila gorrien alde posizionatu zen, eskuinekoa aldiz, urdinen alde.
Lehen set-eko bukaera aldera urdinek aurrea hartu eta errematatzea lortu zuten. Gorriek amorruz bukatu zuten lehen set-a, eta bigarrena indar handiz hasi zuten. Urdinek ordea, beren joko bikaina atera zuten berriz ere eta aurrea hartzea lortu zuten laster. Gorriek amorrua bideratzea lortu eta aurkariei puntuak jaten hasi ziren bigarren set-aren erdi aldera. Partida bizi bizirik zegoen oraindik eta harmailak zutik jarri ziren.
Puntu bikainak egin zituzten batak zein besteak, eta azken minutura arte berdintasuna nagusi izan zen kantxan. Azkenean, 14-15 eta 14-15 bukatu ziren bi set-ak. Bixente eta Atain nagusi izan ziren bietan.
.
