2025-26 ikasturterako izen emateak zabaldu ditu Marlaxkak
Herritarrak xakera "ingurune hurbilean, hezigarri eta atseginean" jokatzera gonbidatu ditu Hondarribiko Marlaxka xake klubak.
Urri hasieratik ekainaren 19ra bitarte xakera jolasten ikasteko edota jokoan sakontzeko aukera dago Hondarribian. Marlaxka Xake klubak izen emateak zabaldu berri ditu, eta adierazi dutenez adin eta maila guztiei zuzenduriko saioak eskaintzen dituzte.
Klubeko filosofiari jarraiki, hasiberriak xakera modu ludikoan hurbiltzeko ahalegina egiten dute, eta dagoeneko jolasten dakitenei jokoaren sakontasunaz gozatzeko aukera eskaintzen diete.
Saioak talde txikitan banatzen dituzte eta ordutegiak ikasleen beharren arabera egokitzen dituzte. Horien arduradunak Goio Uriarte eta Patxi Diaz izaten dira. Uriarte FVA-EXFeko entrenatzaile autonomikoa eta FGA-GXFko irakasle aurreratua da, eta Diaz FIDE School Instructor eta Europako Xake Hezitzailea (ECU) da.
Saioek hilabetean 20 euroko kostua dute, hau da, urtean 180 euro izaten dira. Gainera, bigarren seme alabatik aurrera %50eko deskontua egiten dute, eta orain artean bezala, zailtasun ekonomikoak dituzten familiei laguntzeko prest agertu dira. Kasu horretan egon ezkero klubera idazteko eskatu dute.
Xakeak onura asko dituela gogorarazi dute: “Arreta, kontzentrazioa eta memoria hobetzeko lagungarria da, eta analisi, sintesi eta antolaketa gaitasunak garatzen ditu. Arazoak konpontzeko eta erabakiak hartzeko gaitasuna landu eta antolamendu logiko-matematikoa eta sormen gaitasuna sustatzen ditu. Eta talde lana eta elkarlana sustatzeaz gain, autoestimua, konfiantza eta ahalegina landuz, kontrol emozionala zein egoera berrietara egokitzeko gaitasunak sustatzen ditu”.
Posta elektroniko bidez edota telefono bidez eman daiteke izena: xakehondarribiamarlaxka@gmail.com -era idatzita edota 653 724 877 telefonora deituta.
