Gaur jarriko dute martxan Artoteka arte garaikideko zerbitzua
18:00etatik 20:00etara jarriko dute zerbitzua martxan. Haren bidez interesa duten pertsonek artelanak maileguan eskuratu ahal izango dituzte.
CBAko Artoteka espazioa, inaugurazio egunean. Ximun Leturia Lete Pasa den astean inauguratu zuten CBAren Kultura eta Sorkuntza zentroa, eta gaurtik bertako zenbait zerbitzu jarriko dituzte martxan; tartean, Artoteka. Arte garaikidea zabaltzeko eta bitartekaritza artistikorako plataforma bat da Artoteka, eta tokiko artea zenbait publiko eta eguneroko bizitzako espazioetara hurbiltzeko asmoz sortu dute.
Zerbitzu horren bidez interesa duten pertsonek artelanak maileguan eskuratzeaz gain, sortzaileekin bitartekotza jarduerak egin ahal izango dituzte. “Horrela, interesa duten pertsonek bertako artisten lana ikasi, esperimentatu eta gozatu ahal izango dituzte, eta beren lanen bidez egungo erronkei buruz hausnartu ahal izango dute”, gehitu dute arduradunek.
Era berean, nabarmendu dute Artoteka ekimena arte garaikidea zabaltzeko modu berriak sortzeko beharretik jaio dela “tokiko artisten lana ikusarazteko eta tokiko sorkuntza artistikoa eta haren gozamena pertsonen eguneroko bizitzara hurbiltzeko”.
Une hauetan, honako artista hauek osatzen dute Artoteka: Mawatres, Ivan Gomez, Maite Pinto, Izaskun Araluzea, Juana Garcia Pozuelo, Estela Miguel, Saioa Olmo, Veronica Domingo, Miguel Cordero, Raisa Alava, Ra Asensi, Jenni Alvarado eta Raquel Meyers.
Obrak mailegatzeko bi modu daude:
- 300 eurotik beherako balioa duten obrak. Obrak garraiatu eta muntatzea interesdunen ardura izango da. Maileguak eta itzulketak ostegun arratsaldero egin ahal izango dira, eta hiriko hainbat elkarteri gonbidapena egingo zaien ekimenaren berri emateko.
- 300 eta 6.000 euro arteko balioa duten obren mailegua. Balio hori duten obrak ikastetxe, egoitza, osasun etxe eta antzeko gune kolektiboei eskainiko zaizkie. Mailegua martxan jartzeko bitartekaritza jarduerak diseinatuko dira, gune bakoitzaren ezaugarriak eta erabiltzaile zein artisten behar eta interesak kontuan izanik.
Bi kasuetan obrak sei hilabeterako mailegatu daitezke gehienez.
Aipatutakoaz gain, aurreratu dute Artotekak gehienez ere 6000 euroko balioa duten bost artelan instalatuko dituela udal espazioetan, eta hirutan obra uzten duen artistarekin tailerrak antolatuko dituela.
Zerbitzua gaurko 18:00etatik 20:00etara egongo da martxan.
Xehetasunak
Norbere obrak Artoteka bilduman sartzea nahi duten artistek portfolio bat bidali behar dute helbide honetara; gehienez ere hamar obra eta bakoitzaren fitxa teknikoa txertatu daitezke mezuan. Hala ere, zenbait irizpide hartuko dituzte kontuan; hala nola obra Artotekaren helburuak lortzeko egokia izatea eta arte garaikidearen egungo diskurtsoen ildotik joatea edota artistak arte gaiei buruzko bitartekaritza tailerrak ematen esperientzia izatea eta haiek euskaraz emateko gaitasuna izatea.
Artotekak urtebeteko kontratu bat sinatuko du hautatutako artista bakoitzarekin artistak sei obra utz ditzan. Sei horietatik hiruk 6000 eurorainoko balioa izan beharko dute, eta beste hiruk 300 eurorainokoa. Artotekan utziko diren obrak urte osoko bilduman mantentzeaz gain, udalaren webgunean eta sare sozialetan partekatuko dituzte.
