Mugikortasunaren Europako Astea ospatuko dute Irunen
Hilaren 16tik 22ra zenbait jarduera egingo dituzte. Nagusikleta, Eskola bidea eta bigarren eskuko bizikleten azoka izango dira, tartean, Irunen.
Gaur goizean Irungo Udalak Mugikortasunaren Europako Astea aurkeztu du; hilaren 16tik 22ra izango da, eta egun horietako helburua da “mugikortasun jasangarriak herritarren eguneroko bizitzan dituen onurez sentsibilizatu eta kontzientziatzea”. Hots, “autoaren erabilera zentzugabeak hiriak eta ingurumenean eragiten dituen kalteak” azaltzea eta garraio jasangarria erabiltzeak dituen onurak zein diren ere erakutsi nahi dute.
Egitarau guztitik (ikus albistearen amaiera) honako jarduerak nabarmendu dituzte: bizikleta martxa herrikoia, emakumeek hirian bizikleta erabiltzeko tailer praktikoa, Nagusikleta eta Autorik gabeko munduko eguna. Sergio Javier Irungo Udaleko Mugikortasun Jasangarriko ordezkariak eta Iñigo Berges Segurtasunerako eta Herritarren Bizikidetzarako ordezkariak eman dituzte ekintzen xehetasun guztiak.
Javier: “Mugikortasun jasangarria sustatzen duen hiri eredu batean sinesten dugu, eta ziur gaude programazio honek efektu pedagogikoa izango duela herritarrengan; planeta errespetatzea bultzatuko dugu, eta mugikortasun jasangarriaren alde lan egiten dugula erakusten jarraituko dugu etorkizunean gure hiriak ahalik eta atseginenak izan daitezen ingurumenarekin”.
Egitaraua
- Hilaren 16tik hilaren 22ra.
- Elatzeta ikastolaren inguruko zirkulazioaren arintzea. Elatzeta ikastolaren ingurua (Araba kalea).
- Hilak 17, asteazkena.
- Emakumeek hirian bizikleta erabiltzeko tailer praktikoa. 16:00 – 18:30, Bideko Heziketarako Ibaria zentroa.
- Hilak 18, osteguna.
- Nagusikleta Balazta eta Nagusilan elkarteen eskutik. 17:00, Caserren Anakako egoitza. (Ez da aurrez izenik eman behar).
- Hilak 19, ostirala.
- Eskola bidea Eguzkitza ikastetxearen eskutik. 08:35, Euskal Herria hiribidetik Eguzkitza ikastetxera.
- Hilak 21, igandea.
- Bigarren eskuko bizikleten azoka Txingudiko Zerbitzuen eskutik. 10:00-14:00, Zabaltza plaza.
- Bizikletak konpontzeko kamioia Gipuzkoako Foru Aldundiaren eskkutik. 09:30-15:00, Zabaltza plaza.
- Bizikleta martxa herrikoia Irungo Udalaren eta Txingudiko Ekoetxearen eskutik. 11:00, Zabaltza plaza eta Plaiaundiko parke ekologikoko aparkalekua.
- Hilak 22, astelehena.
- Autorik gabeko munduko eguna. Colon ibilbidea bizikletek, trizikloek, mugikortasun pertsonaleeko ibilgailuek, autobusek, taxiek eta larrialdietako zerbitzuek bakarrik erabili ahal izango dute. 10:00-19:00, Colon ibilbidea.
