E30 lineak iaz baino %70 bidaiari gehiago jaso ditu
Aireportua Donostiako erdigunearekin lotzen duen autobus linearen eraginkortasunagatik baikor mintzatu da Azahara Dominguez foru diputatua.
Azahara Dominguez Mugikortasuneko, Turismoko eta Lurralde antolaketako foru diputatuak azaldu duenez, E30 lineak (Donostiako Aireportua Gipuzkoako hiriburuarekin lotzen duen autobus lineak) hazkunde handia jasan du iaztik. Datuen arabera ia bidaiari bikoitza garraiatu du errefortzuzko linea horrek, 10.000 bidaiariren langa gaindituz.
Bidaia kopuruari dagokionez ere %73,67 bidaia gehiago erregistratu dituela jakinarazi du diputatuak: iaz 5.939 egin zituen eta aurten 10.315 bidaia izan dira.
E30 linea aurreneko aldiz martxan jarri zenetik, haren eraginkortasuna hobetzeko zenbait aldaketa egin ditu aldundiak. Esaterako, abuztuaren 4tik aurrera bi espedizio gehiago gehitu zituzten: 13:20etako autobusa eta 21:20etakoa, eta aldi berean, Mugi txartel anonimoak aireportuaren barruan erosteko aukera ezarri zuten,. Azkenik, E20ak aireportuaren kanpokaldean geldialdia egiteari utzi zion.
Azken hori LAB sindikatuaren eskakizun bati esker gertatu zen. Izan ere, ekainaren 20an linea martxan jarri zenean E30ak E21a ordezkatu zuen, baina E20ak Aireportuaren kanpokaldean geldialdia egiten jarraitu zuen.
LAB Euskal Sindikatuak orduan linea horren eraginkortasuna kolokan jarri zuen, 2024ko Lurraldebusen datuen arabera 4 hilabeteren ondoren 7.685 bidaiari soilik jaso zituela eta E21ak denbora tarte berean 131.201 bidaiari jaso zituela argudiatuz. Datu horiek kontuan hartuta, sindikatuak E20 linearen aireportu kanpokaldeko geltokia ezabatzeko eskatu zuen.
Aldundiak proposamena aintzat hartu eta geltoki hori, E30a martxan zen bitartean, ezabatzeko erabakia hartu zuen.
E30ari esker aireportuaren loturak “nabarmen” egin duela hobera nabarmendu du diputatuak, eta gogorarazi du linea berri hori ez dela soilik turistentzat, gipuzkoarrei ere zerbitzua ematen den linea ere badela adierazi du. Gainera, Lurraldebusek Oarsoaldean eta Bidasoan martxan jarriko duen emakida berrian, zerbitzu hori maletentzako lekua duen autobusekin ematea aurreikusten duela aurreratu du.
Hobekuntza horien guztien helburua argia dela esan du diputatuak: “Gipuzkoan gero eta pertsona gutxiagok ibilgailu pribatu baten beharrik izan ez dezaten bizitza garatu ahal izateko”.
