Hilaren 17an irekiko dute Super Amara Gabonetako Kroseko izen ematea
Abenduaren 20an izango dira haurren zein helduen lasterketak, eta izen emateak hilaren 17an (datorren asteazkenean) zabalduko dira.
Iaz hamargarren urteurrena ospatu ondotik, Super Amara Gabonetako Krosaren hamaikagarren edizioa jokatuko dute abenduaren 20an, 16:45ean. Lasterketa horretan izena emateko epea hilaren 17an (datorren asteazkena) zabalduko da online, eta 12 euro ordaindu beharko da buruko. Inskripzioa abenduaren 19ko 13:00ak arte egongo da zabalik, eta ezin izango da egunean bertan izenik eman.
Helduez gain, haurrek ere izango dute lasterketa horretan parte hartzeko aukera. 15:30ean izango da txikien txanda, eta hiru euro ordaindu beharko da izena emate bakoitzeko. Hiru euro horietatik bat aurtengo ediziorako aukeratu duten elkartasun proiektura bideratuko dute. Helduen zein haurren lasterketen kasuan borondatea emateko aukera egongo da.
Oraindik ez dute zehaztu aurten zein elkartasun proiektu babestuko duten, baina aurreratu dute datozen egunetan zehaztuko dutela.
