EH Bildu: "Aurrerapausorik ez dagoenean, atzera egiten da"
Alardearen gatazkaren konponbidearen aldeko konpromisoa berretsi eta proposamen "erreal" berri bat ezarri du mahai gainean alderdi subiranistak.
Hiru egun geratzen dira Hondarribiko Jaiei hasiera ofiziala emateko, eta lau egun 2025eko Alarde Egunerako. Data esanguratsu horiei begira, 2023an eta 2024an ez bezala, alkateak ez du “aurrerapen adierazgarririk” egiterik izan, eta “iaz emandako urratsak egonkortzeko” helburuarekin jokatu duela azaldu zuen joan den ostiralean emandako prentsaurrekoan.
EH Bildu alderdiak, ordea, aurrerapauso ezak “atzera egitea” suposatzen duela adierazi du, aurten sinatutako dekretuarekiko desadostasuna erakutsiz: “Edozein giza eskubideen aitortzan gertatzen den moduan aurrerapausorik ez dagoenean atzera egiten da, eta hala ikusten dugu kasu honetan ere”.
Batez ere, ez dute ontzat eman bi alardeen aukerari bidea ireki nahi izatea; izan ere, “espazio publikoaren banaketa eta emakumeen aurkako ordutegia” planteatzeak segregazioa eragiten duela uste dute. “Ez dugu onartzen hogeita hamar urte dituen gatazka batean tradizio berriak asmatzea, horien helburua herritarren sakabanaketa, segregazioa bada”.
Irailaren 6ko kantineren “aurkezpen baztertzailea” ere izan dute hizpide bikideek, eta honako hitzordua udalaren jaietako programan jaso izana ere ez dute begi onez ikusi.
Aurten aurrerapen txiki bat egon bada, Jaizkibel Konpainiak Arma Plazan egoteko baimena jaso duela izan da. Baina pauso horretan bizikidetzaren eta segurtasunaren izenean Jaizkibel Konpainia eta “eskubideak ukatzen dituen HAOSE” maila berean jarri izana salatu dute EH Bilduko kideek. Alderdiarentzat ezinbestekoa da gatazkaren konponbidean “benetako urratsak” ematea, eta ez “gatazkaren kudeaketaren zurrunbiloan kateatuta ibiltzea”.
Dena den, legealdi honetan konponbidea bideratu ahal izateko behar diren oinarriak lantzeko aukera badagoela uste dute zinez, eta helburu hori lortzeko asmoz, proposamen “erreal” berri bat ezarri dute mahai gainean. Proposamen horri irailaren 9tik aurrera heltzea espero dute bilkideek.
“Nahiz eta ez egon nahiko genukeen egoeran, ez dugu etsiko. Argi adierazi nahi dugu alardearen gatazka behin betiko gainditzeko desira edukitzeaz gain, hori bideratzeko proiektua ere badugula, eta gure eskuetan dagoen lan guztia egiten jarraituko dugula legealdi honetan benetako konponbideak eman daitezen”.
