Eman daiteke izena Ahalduntze Eskola zein Eskola Feministako saioetan
Gaurtik hasita, zabalik dago izen emate epea. Jarduerak irailetik abendura bitartean izango dira. Programazio osoa aurkeztu dute.
Maite Cortina Irungo Udaleko Berdintasuneko eta LGTBIQ+ Eskubideetarako ordezkariak eta Irungo Emakumeen Etxea elkarteko ordezkariek Ahalduntze Eskolako eta Eskola Feministako udazkeneko programa aurkeztu dute gaur Emakumeen Etxean bertan. Zenbait ikastaro eta tailerretako hezitzaileak ere izan dira aurkezpenean: Sandra Piñeiro, Isabel Allende, Teresa Castro, Sonia Ruiperez eta Nerea Almazan, kasu.
Cortina: “Bi zerbitzuak finkoak dira dagoeneko Berdintasun Zerbitzuaren programazioaren barruan, eta parte hartzea gero eta handiagoa da. Izan ere, elkartzeko aukera ematen diete emakumeei, baita denek batera hainbat gai lantzeko aukera ere: enplegu bilaketa, amatasuna, elikadura… Irungo Emakumeen Etxea erreferentzia bihurtu da emakume askorentzat, eta jarduerak generoaren ikuspegitik antolatzen jarraituko dugu”.
Gauzak horrela, honakoa da eskaintza:
- Ahalduntze Eskola. Euskal mitologiari buruzko tailer trinko bat eskainiko du.
- Ikastaroak ere emango dituzte: Bidea eraikitzen: lana bilatzeko gakoak; Familiak, feminismotik; Gorputzaz harago; Fanzine feminista eta Eskatzen eta negoziatzen ikastea.
- Eskola Feminista. Bost tailer: Ahotsak askatzen; Joskintza jasangarria; Queer topaketak; Eguneko menua eta Barreterapia: barre egin, bizitzeko.
Ikastaro eta tailer horiek doakoak izango dira, eta Emakumeen Etxean bertan izango dira. Saio horietan izena eman nahi duenak bihartik (hilak 3) hilaren 16ra izango du horretarako aukera Irungo Emakumeen Etxean edota online, udalaren webgunean. Emakume bakoitzak hiru ikastaro edo tailerretan eman dezake izena gehienez, eta Irunen erroldatutako emakumeek lehentasuna izango dute. Eskaria handiagoa bada zozketa egingo dute. Haatik, izena ematen dutenen kopurua ez bada gutxienekora iritsi, izena emateko epea luzatuko dute gutxienekoa osatu arte edo jarduera hasi baino astebete lehenagora arte. Behin tailer eta ikastaroak hasita, jakinarazi dute ez dela onartuko parte hartzaile gehiago.
Aipatutako saioez gain, Elkarrizketa Feministak, Bingo feminista eta Lola, Lolita, Lolaza dokumentalaren emanaldia programatu dituzte udalaren eta Irungo Emakumeen Etxearen arteko hitzarmenaren esparruan.
Hots, udaleko Berdintasunerako eta LGTBIQ+ Eskubideetarako Zerbitzuak beste hitzaldi batzuen berri ere eman du: Fanzinea, aldarrikapen arma; Pentsamendu magikoaren basoa, izena duenak izana badu eta Elikadura nahasmenduak. Gainera, emakume artista eta sortzaileak errekonozitzeko eta ospatzeko jardunaldi bat egingo dute urriaren 23an, Emakumeen Etxean bertan.
Bestalde, Emakumeen Etxeak zenbait topagune antolatu ditu: Komunikazio positiboa eta autoestimua; Partekatu, eraldatu, jarraitu… eta Gure artean. Horietan izena eman behar da Emakumeen Etxean bertan edota 943 50 55 05 zenbakira deituta. Urte osoan eman daiteke horietan izena.
Hori gutxi balitz, bakarrizketa ibiltariekin azalduko dute zer den Emakumeen Etxea, nola funtzionatzen duen eta zer eskaintzen duen. Hilaren 19an izango da haren hurrengo hitzordua.
Emakumeen Etxeak, era berean, Irunen erroldatutako emakumeentzako hiru aholkularitza zerbitzu eskaintzen jarraituko du hitzordua eskatzen dutenei: aholkularitza juridikoa, aholkularitza sexuala eta tituluak homologatzeko aholkularitza. Bizimodu aktiboa eramateko eta jarduera fisikoa egiteko orientazioa ere emango dute.
Azkenik, agerraldian jakinarazi dute haurtzaindegi zerbitzua eskainiko dutela Emakumeen Etxean jarduerak egiten dituzten bitartean. Horietan 4 eta 12 urte arteko haurrak zainduko dituzte, eta ez da ordaindu behar horretarako.
Egitaraua osorik ikusteko, egin klik hemen.
