Ahalmen ekonomikoaren araberako ordainketa sistema, martxan
Aisialdiko zenbait ekintzetako tarifak erabiltzaileen diru sarreretara zein ondarera egokitzen dira. Eskaera bat aurkeztu behar da horren onuradun izateko.
Irungo Udalak gogorarazi du zenbait zerbitzutan ahalmen ekonomikoaren araberako ordainketa sistema aplikatuko dela irailetik aurrera eskola kirola, zeramika tailerra, marrazketa eta pintura akademia, haur txokoetan zein musika eskola eta kontserbatorioan. Sistema horren bidez tarifak erabiltzaileen diru sarreretara eta ondarera egokitzen dira “kultur, hezkuntza eta kirol arloko jardueretan parte hartzeko aukerak ekitatiboagoak izatea bermatzeko, udalak aukera berdintasunarekin eta inklusio sozialarekin hartutako konpromisoaren sendogarri”.
Sistema hori aurten jarri dute martxan, eta honezkero Solas Jolas eta AbenturaERO programetan zein udalekuetan aplikatu dute. Ildo horretatik, jakinarazi dute orain arte mila lagun inguruk tramitatu dutela udaleko ogasun arloak zerbitzuen tarifetan haien diru sarreren araberako deskontuak aplikatu ahal izateko baimena.
Nuria Alzaga, Ogasuneko ordezkaria: “Sistema hau aplikatuta, udalak pertsona bakoitzaren egoera ekonomiko eta familiarrari erantzuten dio. Gure ustez, hiriko kultur, hezkuntza eta kirol arloko jardueretan parte hartzea ezin da izan ordainketa ahalmenaren araberakoa, baina familia batzuek eta besteek ez dituzte aukera berdinak. Tarifak diru sarreretara egokitzea pertsonen bizitza errazteko modu bat da, eta aukera berdintasunarekin eta hiria ekitatibo eta inklusiboagoa izatearekin hartua dugun konpromisoaren adierazgarria da”.
Behin norbanakoak eskaera aurkezten duenean, ekitaldi fiskal osan mantenduko da eskatzaileari egokitzen zaion tarifa, eta irizpide bera aplikatzen duten udal zerbitzu guztietarako balizkoa izango da familiek ez ditzaten berriro egin tramiteak. Eskaera hori automatikoki berrituko da urtero eskura dauden datu fiskalak edo interesdunek ematen duten informazioa baliatuz.
Ordaindu beharreko zenbatekoa zehazteko lau tarifa bereizi dira, urteko diru sarreren arabera: errenta 15.120 eurotik beherakoa bada, tarifa osoaren %5; 23.188 eurotik beherakoa bada, tarifa osoaren %35; 29.096 eurotik beherakoa bada, tarifa osoaren %55; eta 29.096,01 eurotik gorakoa bada, tarifaren %100.
Erreferentziazko errentak, gainera, kenkari batzuk hartzen ditu barnean: ordaindu beharreko zenbatekoa are gehiago egokitzeko erabiltzaileak edo familia unitateko kideren batek desgaitasunen bat badu, erabiltzaileak adingaberen bat badu bere ardurapean edota familia guraso bakarrekoa bada, bestek beste.
Era berean, udalak gogorarazi du garrantzitsua dela eskaera aurkeztea sistema hau aplikatzeko, hori egin ezean tarifa osoa aplikatuko baita automatikoki. Eskaera telematikoki tramitatu daiteke udalaren egoitza elektronikoan, Irun txartelarekin, BakQ sistemarekin, NAN elektronikoarekin edota IZENPE ziurtagiria erabiliz. Irunen erroldatuta ez daudenek, haatik, instantzia orokor bat aurkeztu behar dute familia liburuarekin batera.
