Behin behineko komun publikoak jartzeko eskatu du EAJk
Uda garaian "deserosotasuna eta bide publikoan higiene arazoak" ekiditeko aldi baterako komun publikoak ezinbestekoak direla uste dute jeltzaleek.
Uda garaian bisitari asko jasotzen ditu Hondarribiak, batez ere Santiago Eguna edota Arraun Eguna bezalako data berezietan. Urteko hilabete horietan, beraz, herriko kale eta aisialdi guneetan sortzen diren beharrei erantzuteko aldi baterako komun publikoak jarri izan dira urte luzez. Aurten, ordea, horien falta sumatu dute jeltzaleek.
Hori dela eta, aldi baterako komun publikoak “lehenbailehen” jartzeko eskatu diote udal gobernuari, horiei esker “ongizate orokorra” bermatu eta “hiria garbi mantentzen” baitzen. Aurtengo udan, ordea, aldi baterako “komun bat bera ere ez” jarri izanak “deserosotasuna eta bide publikoan higiene arazoak” sorrarazi ditzakeela uste dute.
Jeltzaleak jakitu dira udal gobernu taldeak Arrantzale auzoan bainu publiko iraunkor bat instalatzeko asmoa duela, baina “oraindik ez dakigu noiz instalatuko den” deitoratu dute. Neurria positibotzat jo duten arren, udako hilabeteetako eskariari erantzuteko “nahikoa ez” dela deritzote.
Beraz, udal gobernuari gutxieneko azpiegiturak bermatu ditzaten eskatu diote.
