Maialen Altunari eman diote Julia Iruretagoiena beka
Ikerketaren izena 'Construyendo nuevas vidas, redes y comunidades. Mujeres que migraron a Irun (1950-1970)' da. Bi urte izango ditu azterlana garatzeko.
Emakumeek Irungo historiari egindako ekarpena ikusarazteko asmoarekin sortu zen Julia Iruretagoiena beka eta bigarren edizioa da aurtengoa. Udaleko Berdintasun eta LGTBQ+ departamentuak jakinarazi du Maialen Altunari eman diotela dirulaguntza Construyendo nuevas vidas, redes y comunidades. Mujeres que migraron a Irun (1950-1970) lanagatik. Dirulaguntza 18.000 eurokoa da eta bi urte izango ditu ikerketa burutzeko.
Altunaren aurretiko “lan bikaina” balioan jarri du Maite Cortina Berdintasun zinegotziak eta beka honen bidez landuko duen lanari buruzko xehetasun batzuk eman ditu: “Duela mende erdia gure hirian bizi izan genuen errealitatea landuko du, alegia, gizarte irundarrean murgiltzen jakin izan zuten emakumeak iritsi zirenekoa, gizarte nahiz politika mailan konplexua izan zen garaira moldatuz”.
1950. hamarkadan prozesu migratzaileetan parte hartu zuten emakumeen ekarpen historikoa da aztertuko duena Altunak, Euskal Herritik kanpoko haien jaioterria utzi eta Irunen bizitzen jartzea erabaki zutenena.
Oinarria emakume hauen bizitzako istorioak izango dira eta beste iturri batzuekin osatuko du. Prozesu osoa ikertu nahi du Altunak, jatorritik irteten direnetik hasi, bidaian murgildu eta Irunera iritsi arte. Halaber, udalerrian egindako lehen urteko bizipenak ikertuko ditu. Hiru ardatz nagusitan bereiziko du lana.
Emakume hauen egunerokotasunari ere erreparatuko dio ikertzaileak eta egin zuten ekarpenari begira jarriko da, migratzaileek izan zituzten zailtasun eta erronketan sare sozialen eta elkarren arteko babesaren eragina aztertuz.
