Irundik abiatuko da Udanbizi txirrindulari bira
Izaera soziala duen txirrindularitza bira izango da Goiener eta I-ener elkarteek antolatu dute. Dagoeneko izena eman daiteke
Udanbizi 2025 txirrindularitza bira antolatu dute Goiener elkarteak eta I-ener herritar sozietateak Nafarkoop kooperatibaren laguntzarekin, eta Irundik abiatuko da ondoren Lapurdi, Nafarroa Beherean eta Nafarroa Garaian barrena joateko. Asmoa, taldean elkartzea eta esperientziak eta ezagutzak partekatzea da pedalei eraginez eta ongi pasatzen.
Hilaren 14tik 18ra izango den bira honetan zehar ekimen sozialeko proiektuak bisitatuko dituzte eta Euskal Herriko hainbat arazoren inguruan jardungo dira, esate baterako migrazioa edota elikadura. Horretarako solasaldi eta bisitak antolatu dituzte lotan geldituko diren herrietan eta errepidean.
Goienerren bidez izena ematen dutenek 12 euroko bazkidetza ordaindu beharko dute. Interesa duenak galdetegi hau bete beharko du. Onarpenaren mezua jaso beharko du parte hartu nahi duenak eta ondoren 85 euro ordaindu beharko ditu. Tarifaren barne dago hamaiketako sendoa eta afariak, lo egiteko lekuak, solasaldiak, bisitak eta abar. 20 pertsonentzako lekua dago.
Lehen etapa Irundik Sarara izango da hurrengo hilaren 14an eta 33 kilometro egin ondoren, Bidasoa Etorkinekin taldeko kideak egongo dira helmugan hitzaldi bat emateko prest. Azken etaparen azken helmuga Bera izango da eta Aroztegiaz solastatuko dute. Etapa guztiak kontsultatzeko jo web orri honetara.
Materialari begirako hainbat gomendio eman dituzte. Parte hartzaileek lo zakua eta aldatzeko arropa eraman beharko dute eta eskatu dute saiatzeko oinarrizkoa soilik eramaten. Txirrinduari begira, ordezko kamara bat, partxeak eta puzgailua eramateko gomendioa eman dute. Kaskoa, berriz, nahitaezkoa izango da.
Zalantzak argitzeko mezu bat bidal daiteke helbide elektroniko honetara.
