Jaietako programazioan, 150 jarduera baino gehiago
Sanmartzialetako jai egitarauaren aurkezpena egin dute gaur udal zinegotziek eta herriko eragileek. Udalak ez du alardea udal egitarauaren barnean gehitzeko asmorik adierazi.
2025eko sanmartzialen aurkezpena egin dute gaur.Izaro Perez Loperena Hilabete eskas falta da Irungo jaiak has daitezen eta Irungo Udaleko sailek– eragileekin elkarlanean– jada osatu dute 150 jarduera baino gehiago jasotzen dituen sanmartzialetako egitaraua. Kartel iragarlea Irati Amantegiren Zain izango dela jada iragarri zen, baita jaietan zein musika taldek joko duten ere. Gaur, berriz, jardueren txanda izanda eta aste honetan pregoia nork joko duen iragarriko dute. Ordutik aurrera, atzera kontaketa hasiko da.
Egitaraua, ekainaren 2tik aurrera hasiko dira zabaltzen Irungo buzoietan baina udal webgunean ja irakur daiteke.
Gaurko agerraldian Cristina Laborda alkatea bertan izan da eta haren ondoan hainbat zinegotzi: Nuria Alzaga Kultura zinegotzia, Borja Olazabal Kirol zinegotzia, Josu Igiñiz Euskara zinegotzia eta Sandra Caballero Gazteria zinegotzia. Herriko eragileak ere hantxe izan dira, denak zapi gorria soinean.
Alkatearena izan da lehenbiziko hitza Irungo jaiak, antolakuntzari begira udalak daukan erronka handiena dela aitortu du. Urteko egun garrantzitsuenak direla irundarrentzat nabarmendu du eta horregatik herri osoak parte hartzen duela. Eskertu egin du Labordak udaleko sail guztien lana, baita parte hartu duten eragileena ere. Alzagak adierazi du programazio hau “Irunen” prestatutakoa dela eta “irundarrentzat”.
Gazteguneko programazioari begira jarrita, Igiñizek azaldu du Euskara departamentuak aurten ez duela esku hartu gune honen egitarauan. “Gaztegune programak zuen helburua euskarazko guneak sortzea zen eta hori bermatzen ez zenez, bertan behera uztea erabaki da”, adierazi du. Gune honetan eragiten egon ordez, gazte eta helduentzako magia jarduerak antolatuko dituzte, hiritarrak euskarara “modu dibertigarrian” gertura daitezen. “Helburua, euskarari jaietan kilima egitea da, hiritarrak euskara erabiltzera gonbidatuz aisialdiko lekuetan, lagunekin eta ezagunekin, lagunekin eta tabernetan ere. Bultzada, magiaren bitartez emango da”, zehaztu du.
Dena den, euskararen erabilerarekiko konpromisoa hartzeko ez dela “magiarik behar” esan du Igiñizek, “soilik erabiltzeko borondatea eta konpromisoa” behar direla uste du. “Hori eskatu nahi diet herritarrei, jaietan euskara erabiltzeko konpromisoarekin jarraitzea”, eskatu du.
Kirolaren esparruan, Olazabal zinegotziak esan du jaien giroa gertu dagoela eta Espainiako Kopak erakusten duela hori. Besteak beste, hainbat jarduera nabarmendu ditu: uztailaren 1eko pilota partida; 3×3 saskibaloi txapelketa; eta Aiako Harriko natura parkeko mendi martxa. Ekitaldi adierazgarriena ekainaren 8ko San Pedro klasikoaren 104. edizioa dela uste du Olazabalek edota ekainaren 22ko San Martzialera igotzeko mendi martxa.
Adineko elkarte eta talde ezberdinak ere egitarauan lanean aritu dira eta Igiñizek nabarmendu du ez dutela zertan haiei begira antolatutako ekimenetan soilik parte hartu dezaketenik, programa orokorrean adineko pertsonentzat ere badiren jarduerak daudelako. Besteak beste, Tsunami orkestraren emanaldia nabarmendu du zinegotziak, ekainaren 15ean izango dena Zabaltza plazako kioskoan 18:00etan. Era berean, Remember orkestrak adinekoentzako dantzaldia eskainiko du Palmera Monteron eta eguraldia kaskarren bada, Eguzkitzako jolastokian.
Gaztegunea erreferentziazko gunea izatea nahi du udalak, bereziki ekainaren 25ean, 26an eta 27an. Aisialdian eta giro onean oinarritutako programa prestatu dute eta bertan zuzeneko musikaz gozatzeko aukera egongo da. Horrez gain, gaming eta errealitate birtual gunea antolatu dituzte, baita dantza masterclass. bat, dantza akademien flashmob-a, street escapeak eta IrunTxef txapelketa Asier Rodriguezen eskutik.
Alardea
Udalak alardea berriro publikoa izateko bidean ea antolatzeko asmoa daukan galdetuta, Labordaren erantzuna honako hau izango da: “Alardeak ulertzeko bi modu daude eta bi modu horiek elkarbizitza egiten dute eta elkar errespetatzen dira. Beti esaten dugun moduan, uztailaren 1ean irakurtzen dugun berri garrantzitsuena festak dir-dir egiten duela da”.
