Plaza libreak, udal euskaltegiko A1 mailan
Hilaren 28tik ekainaren 20ra izango da ikastaroa. Langabezian daudenek doako matrikula izango dute, eta gainontzekoak ohiko matrikula ordaindu beharko dute.
Hilaren 28an hasiko dira A1 mailako klaseak eskaintzen udal euskaltegian eta udalak jakinarazi du plazak libre geratu direla. Ikastaroa ekainaren 20ean bukatuko da eta goizez izango dira klaseak, 09:00etatik 13:15era. Izena emateko udal euskaltegira gerturatu behar da (Urdanibia plaza, 5). Telefono bidez ere egin daiteke: 943 505 273.
Ikastaro trinko honetan parte hartzen dutenek eta Lannahi programaren baldintzak betetzen dituztenek, doakoa izango dute matrikula. Honako hauek dira baldintzak: Lanbiden lan eskatzaile bezala inskribatuta egotea; eta langabezian egotea, %50 edo gehiagoko aldi baterako enplegu erregulazioko espedientean egotea. Edota lanean egonda ere, lanaldia jardun osoaren %50 ez gainditzea.
Lannahiren baldintzak betetzen ez dituztenek ohiko matrikula ordaindu beharko dute eta diru hau udalak urtero ateratzen duen beka deialdiaren bidez berreskuratzeko aukera izango dute.
