Erabat doan izango da Hondarribian euskara ikastea
EH Bilduk sustatuta, Hondarribiko Udalak Euskara alorreko diru-laguntzetan aldaketak egin eta laguntza-lerro berri bat sortu du. Horri esker, erabat doakoak izango dira euskalduntze ikastaroak, besteak beste.
EH Bilduk sustatuta, Hondarribiko Udalak euskararen normalizazioan eta zehazki horren erabileran urrats eraginkorrak eman daitezen, aurtengo Euskara Saileko diru-laguntzen oinarriak aldatu eta laguntza-lerro berri bat sortu du. Horretarako, iazko aurrekontuarekin alderatuta, 10.000 euro gehiago bideratu dituzte.
Laguntza-lerro berriari dagokionez, aisialdiko begirale zein zuzendari izateko eta kirol entrenatzaile izateko ikastaroak euskaraz egiten dituztenek diru-laguntza jasoko dute. Laguntza ikasleek eta ikasketa horien ardura hartzen duten elkarte edo erakundeek jasoko dute. Formakuntza 2025ean hasi eta urte berean amaitu behar da. Udalak matrikularen %50a ordainduko du, eta kopuru hori ez da 250 euro baino gehiagokoa izango.
Bestetik, 2020an onartutako diru-laguntzen oinarriak aldatu dituzte. Aldaketa nabarmenena euskalduntze ikastaroetarako laguntzetan egin dute, hemendik aurrera erabat doakoa izango baita: euskalduntze eta alfabetatze ikastaroak egin dituzten 16 urtetik gorako herritarrentzat, baita autoikaskuntza ikastaroak, barnetegietan ikastaroak edo unibertsitateek udan euskaraz euskal kulturari buruz antolatutako ikastaroak egin dituzten herritarrei matrikula gastuaren kopuru osoa finantzatuko die udalak. Orain arte %75ekoa zen laguntza.
Horretaz gain, errotulazioak euskaratzeko zein webguneak euskaratzeko laguntzetan aldaketak egin dira:
Errotulazioei dagokionez, establezimenduen errotulazioez gain, ibilgailuenak ere txertatu dira laguntzetan. Errotulazioa euskara hutsean jartzen duenari, udalak %50eko laguntza emango dio (gehienez 400 euro) eta euskara zein beste hizkuntza batean jartzen duenari %25a (gehienez 250 euro).
Webguneak euskaratzeko, hizkuntza-irizpidearen araberako aldaketak egin dira, euskara lehenesten dutenak lagunduz: euskara hutsean badago, udalak %100eko laguntza (gehienez 500 euro) emango du; euskaraz gain beste hizkuntza batzuetan eskuragarri baldin badago, baina euskara lehenesten badu, %50eko laguntza (300 euro gehienez); eta euskara lehenesten ez badu %25ekoa. Era berean, “.eus” domeinua erosteagatik haren urtebeteko lizentziari dagokiona emango zaio laguntza bidez (lehenengo urtea soilik).
