Mairuak bueltan izango dira berriz
Urtero bezala, edonor batu daiteke puskak biltzera. Trapu zaharrak jantzi, aurpegia zikindu eta lastozko kapela besterik ez da behar.
Martxoaren 1ean Mairuak bueltan izango dira berriz. 1992an berreskuratu zuten Emeki elkarteko kideek ohitura zaharra eta hogeita hamaikagarrenez arituko dira, baserriz baserri, izpiritu txarrak uxatzen, dantza egiten eta puskak biltzen.
Larunbat honetan goizeko 10:00etan irtengo dira Jaizkibel kanpinetik eta elkarrekin, Akartegitegitik, Zimizargatik eta Gornutzetik dauden 13 bat baserri bisitatuko dituzte: Montañenea, Gurutze, Erranda Zar, Txapelin, Postigu, Mikel Enea, Lujunea, Higeralde, Etxebarria, Lekuona, Nabarrenea eta Arroka Berri jatetxea, hain zuzen.
Ohiko ibilbidea egiteaz gain, duela bi urte Emekiko elkartekideen aurretik Mairutan aritu ziren emakumeak omentzen hasi ziren. 2023an Kontxi Imaz omendu zuten, eta iaz Zelestina Mirandaren txanda izan zen. Aurten Lujune baserriko Juncal Daguer omenduko dute.
Urtero bezala, edonor batu daiteke puskak biltzera. Trapu zaharrak jantzi, aurpegia zikindu eta lastozko kapela besterik ez da behar.
