BAT-eko harrobia sendo lehiatu da asteburuan
Txapelketa garrantzitsuak izan dituzte BAT-eko atletek asteburuan: 23 urtez azpiko pista estaliko (Short track) Espainiako Txapelketa, Euskadiko Jaurtiketa Luzeen Txapelketa eta 18 urte azpiko eta 20 urte azpiko Gipuzkoako Txapelketa.
Bidasoa Atletiko Taldeko kirolariek lehia garrantzitsuak izan dituzte asteburuan. Batetik, 23 urtez azpiko pista estaliko (Short track) Espainiako Txapelketa jokatu da Sabadellen (Katalunia). Zilarrezko domina bat, zenbait finalista postu eta hainbat marka pertsonalekin itzuli ziren klubeko atletak Kataluniatik.
Emaitzarik nabarmenena Victoria Brisorena izan zen. Proba konbinatuetan parte hartu zuen eta zilarrezko domina poltsikoratu zuen. Gainera, inoizko markarik onena egitea lortu zuen; 3.767 puntu lortu zituen. Klubetik nabarmendu dutenez oso gertu geratu zen klubeko errekorra egitetik.
Txapelketa erregularra egin zuen Brisok. Proba guztietan bigarren postuan geratzea lortu zuen, Alba Ramirezen atzetik. Honako emaitzak lortu zituen: 60 metro hesietan 8,88 segundo; Altura jauzian 1,63 metro; Pisu jaurtiketan 10,96 metro; Luzera jauzian 5,55 metro eta 800 metroetan 2:25,19 minutu.
Hurrengo lehia Espainiako Short Track-eko Txapelketa Absolutua izango du segoviarrak. Bertan marka hobetzea izango du helburu.
Aitor Fernandez ere proba berean lehiatu zen: Proba konbinatuetan, hain zuzen. Erorketa bat izan zuen arren bosgarren postuan bukatzea lortu zuen asturiarrak. Orotara 4.767 puntu lortu zituen. 60 metro hesietako proban izan zuen erorketa, eta horrek puntu garrantzitsuak lortzea egotzi zion arren, maila ona erakutsi zuen txapelketan.
Honako emaitza hauek lortu zituen: 60 metro 7,25 segundo; Luzera jauzia 6,34 metro; Pisu jaurtiketa 10,85 metro; Altuera jauzia 1,77 metro; 60 metro hesiak 9,32 segundo; Pertika 4,60 metro eta 1.000 metro 2:55 minutu.
Joaquin Alonsok bosgarren bukatu zuen Espainiako Txapelketa. 200 metroetan parte hartu zuen Sabadellen. 23 urte azpiko kategorian debutatu zuen hondarribiarrak. Alonso 400 metro hesietan da espezialista, baina udako lehiaketei begira, neguko prestaketa egiteko baliagarri zaion proba da honakoa. Kanporaketan marka pertsonala egin eta finalerdi zein finalean erregulartasuna erakutsi zuen. Kanporaketan 21,84 segundo; Finalerdietan 21,98 segundo; eta finalean 21,95 segundo.
200 metroetan ere Erik Fernandezek zazpigarren egin zuen. Txapelketan egindako denbora honena baina, kanporaketan egin zuen (21,98 segundo).
Proba berean, baina emakumezkoetan, hamabigarren postuan geratu zen Laia Olaskoaga. Kanporaketa 25,41ko denborarekin gainditu ondoren finalerdietara igarotzea lortu zuen, baina ezin izan zuen finalerako sailkapena lortu. Harekin batera lehiatu zen Martina Villar, eta 26,09 segundoko markarekin ezin izan zuen kanporaketa gainditu.
400 metroko proban, berriz, Gipuzkoako errekor absolutua egin zuen Irune Muguruzak. Finalerdietan eskuratu zuen marka hori. Kronometroa 55,78 segundo geratzea lortu zuen. Denbora horrekin finalerako txartela lortu eta orotara seigarren bukatu zuen.
Lucia Valerok, klubera heldu berri den atletak, ere seigarren bukatu zuen txapelketa. 4:39,16ko denborarekin finalera sailkatzea lortu zuen, eta finalean seigarren izan zen 4:36,42ko denborarekin.
Alex Garcia-Gascok 60 metroetan 7 segundoen langa gainditzea lortu zuen. Hortaz, bere denborarik onenea egitea lortu zuen. 6,98 segundo behar izan zituen metro horiek guztiak egiteko. Dena den, zapore gazi-gozoarekin geratu zen, zentesima bakar batengatik ez baitzen finalerdietako errondara igaro.
Proba berean aritu zen Maniel Rodriguez eta haren marka onenetik gertu geratu bazen ere ezin izan zuen hura gainditu. 8,64 segundoko denboran geratu zuen ordularia.
Euskadiko Jaurtiketa Luzeen Txapelketa
Bestetik, Euskadiko Jaurtiketa Luzeen Txapelketa jokatu zen Durangon. Orotara hiru domina eta bi marka pertsonal lortu zituzten BAT-eko atletek.
Olatz Elizasu 16 urte azpiko disko modalitateko txapeldun izendatu zen, 33,59 metroko distantziarekin. Elizasuk haren markarik onena egin zuen.
Uzuri Martiarena, berriz, txapeldunorde izan zen 18 urte azpiko xabalina jaurtiketan. 34,31 metroko jaurtiketarekin haren inoizko markarik onena egitea lortu zuen ere.
Mailu jaurtiketan Unax Erasok zilarra zintzilikatu zuen 20 urte azpiko kategorian. 51,72ko jaurtiketak eraman zuen sailkapeneko bigarren postura.
Master kategorian bi urrezko domina eta lau zilarrezko eskuratu zituzten. Juana M. Usabarrena eta Miguel Arburua izendatu ziren Euskadiko txapeldun.
Gipuzkoako Txapelketa
Azkenik, 18 urte azpiko eta 20 urte azpiko Gipuzkoako Txapelketa jokatu zen Donostiako Velodromoan. Domina ugari eskuratu zituzten klubeko gaztetxoek, guztira 21 podium.
Gizonezkoen 20 urte azpiko kategorian Aritz Zuazo Gipuzkoako Txapeldun izendatu zen 60 metroko distantzian. 7,24 segundoko denbora egin zuen. Eta aldi berean, txapeldunorde izendatu zen altuera jauzian. 1,89 metroko salto bat eginez.
Ander garamendik ere dizdira egin zuen 1.500ko proban. 3:54,81eko denborarekin urrezko domina bere egin zuen. Eta kategoria honetako dominekin amaitzeko, Adur Ugartemendiak zilarrezkoa eskuratu zuen 3.000ko proban (9:17,33).
20 urte azpiko emakumezkoen kategorian Alaine Agerraldek hasi eta buka menperatu zuen 200 metroko proba. 24,77ko denborarekin, beraz, Gipuzkoako Txapeldun izendatu zen. Leire Martiarena taldekidea izan zuen aurkari Agerraldek Martiarena txapeldunorde izan zen 25,27ko denborarekin. Denboraldi honetan lortu duen markarik onena.
1.500eko proban Izaskun Sanzek urrezko domina eskuratu zuen 4:46,35eko denborarekin. Eta 800 metroko proban brontzezko domina zintzilikatu zuen 2:16ko denborarekin. Altuera jauzian, Jone Agirrek zilarrezko domina lortu zuen, 1,35 metro gainditu ondoren.
18 urte azpiko kategorian Eñaut Arburuak garaipena eskuratu zuen 400 metroetan (51,63). Baita Alai Cabellok ere. Kasu honetan 800 metroko proban eskuratu zuen. 1:56,32ko denborarekin.
Iraupen luzeko proban, Lucas Cabezonek zilarrezko domina lortu zuen 8:55eko denborarekin. Urko Ibargurenek, aldiz, proba berean brontzezkoa zintzilikatu zuen, 9:14ko denborarekin.
Jon Gajatek, Rafael Caseauk, eta Anartz Alonsok zilarezkoa lortu zuten 60 metro hesiak, luzera jauzia eta pisu jaurtiketetako probetan, hurrenez hurren. Gizonezkoen palmaresarekin bukatzeko Ibai Anautek eta Markel Garrantxok brontzezko dominak eskuratu zituzten, pertikan eta 200 metroetan.
Emakumezkoen kasuan, Naia Llorente Gipuzkoako Txapeldun izendatu zen altuera jauzian 1,66metro gainditu ondoren. Nerea Sorondok brontzezkoa lortu zuen 60 metroetan 7,97ko denborarekin, eta azkenik, Mariela Berazak zilarrezkoa lortu zuen 400 metroetan 1:01,72ko denborarekin.
