Anbulatorio berria Bidasoa Lanbide Heziketaren aparkalekuan eraikiko da
Udalak lurzoru hori emango dio Osasun Sailari eta 2028an hasiko dituzte lanak. Ikastetxearen alboko orubea, berriz, hezkuntzarako izatea eskatu dio udalak Eusko Jaurlaritzari.
Irungo erdigunean beste anbulatorio bat eraikiko dute eta kokalekua zein izango den izan da orain arte zehaztu ez dutena. Hasiera batean egungo anbulatorioa handitzeaz hitz egin zuen udalak, baina atzera bota zuen Eusko Jaurlaritzak, eremu horrek ez zuelako betetzen anbulatorio berriak beharrezko dituen metro karratuak.
Pasa den udan, Ekologistak Martxan elkarteak Kolon pasealekuko Euskotren geltokiaren gainean eraikitzea proposatu zuen, baina proposamen honek ez zuen oihartzun handirik izan. Ordutik ia urte erdia pasa denean, Osasun sailburuak argitu du erietxe berria non egongo den: Bidasoa Lanbide Heziketaren aparkalekuan, Pio XIIn. Obrekin 2028an hasiko dira.
Erabaki honen aurrean Cristina Laborda Irungo alkateak adierazi du eskualdeko osasun zerbitzuak hobetzea «funtsezkoa» dela. Era berean, Bidasoa ikastetxeak hezkuntza eskaintza zabaltzeko beharra daukala nabarmendu du. Hamarkada darama ikastetxe honek hazteko beharra udalari azalduz eta hori ezin duela ekidin osasun beharrei erantzuteko proiektuak uste du Labordak.
Bidasoa Lanbide Heziketaren aparkalekuko lursaila eta ikastetxeari itsatsita dagoen orubea udalarenak dira. Aparkalekua, egun, hezkuntzarako kalifikatuta dago, eta ikastetxeari lotuta dagoen orubea, berriz, erabilerarik gabeko gisa.
Beraz, Osasun Sailak anbulatorioa eraikitzeko lursailaren kalifikazioa osasun ekipamenduetarako aldatu beharko du, eta horretarako Plan Berezi bat idatzi beharko dutela aurreratu du alkateak. Plan Berezia idazten dutenean udalak baldintzak jarriko dituela aurreratu du Labordak, esate baterako, eraikinaren bolumenari buruzkoak.
Halaber, ezinbestekotzat jo du alkateak ziurtatzea Bidasoa Lanbide Heziketaren hezkuntza eskaintza handitzea, eta horregatik udalak Osasun Sailari lurra esleitzeko baldintza gisa jarri dio ikastetxearen ondoan dagoen orubea [belardia] hezkuntza ekipamendutarako kalifikatzea. «Bidasoa ikastetxearen beharra mahai gainean jartzea garrantzitsua iruditzen zaigu, puzzlea bere osotasunean ikusteko». Eskaera dagoeneko egina du udalak. Orain, erantzunaren esperoan dago udala baina ez dela «arazorik» egongo uste du alkateak.
