Txakurren erritmora, kirolaz eta naturaz gozatzen
Euskadiko Txakurkross Ligako azken lasterketa eta VIII. Ogi Berri saria egingo dira asteburu honetan. Korrika zein bizikletan, haien txakurrez lagunduta irtengo dira 70 parte hartzaile.
Olatz Zabala eta Lur. Asteburu honetan bukatuko da Euskadiko Txakurkros liga (ETL). Euskal Herriko zenbait elkarte independentek antolatzen duten liga da, eta Hondarribian izaten da urtero azken geltokia. ETLko tituluaz gain, Ogi Berri saria ere izaten da jokoan.
Aurtengo liga bukatzear den honetan, datorren urteari begira daudela kontatu du Iosu Varonak. Lezon sortu, baina egun Hondarribian kokatuta dagoen Euskanikross taldeko kidea da Varona, eta datorren denboraldirako kokapen berriak eta modalitate ezberdinak —bizikleta eta patinak— integratzeko lanean ari dira. Azaldu duenez, lasterketa gutxitan izaten da bizikletan edo patinetan parte hartu ahal izateko aukera. Hondarribian korrikako zein bizikletako modalitateak antolatzen dituzte.
Zazpigarren Ogi Berri saria izango da asteburu honetan gauzatuko dena. Larunbatean 17:00etan hasiko da bizikletako Bikejoring-Canibtt lasterketa. Parte hartzaileek 3,5 kilometro burutu beharko dituzte: Higer itsasargitik irten, antenetara igo eta Talaia bidetik itsasargira itzuli beharko dute. Ondoren, 19:00etan, txakurkros lasterketaren txanda izango da. Kopetako argia piztu eta hirunaka irtengo dira, 15 segundoro. 30 minutuko denbora tartean norberak hautatuko du noiz sartzen den irteera kaxara. Iaz probatu zuten aurrenekoz formula berritzaile hori, txakurren ongizatea bermatzeko. Emaitzarekin gustura, errepikatzea erabaki dute.
Igandean goizeko 08:40ean izango da Bikejoring-Canibtt modalitateko irteera. Euskadiko Txakurkros ligako lasterketa 10:00etan izango da, eta Txakurkros herrikoia —kirola lehen aldiz probatu nahi dutenei zuzendurikoa—, 11:15ean. Jardunaldia haurren txakurkrosarekin bukatuko dute, 12:00etan.
Txakurrak dira protagonistak
Hondarribiko txakurkros lasterketa izan zen Olatz Zabalak egin zuen aurrenekoa. Duela lau urte izan zen hori, eta haren ahizparen txakurra izan zuen gidari. «Ahizparen txakurra gorra da, eta berarekin hasi nintzen mendian korrika. Lotuta eramaten nuen galtzeko beldurra genuelako». Esperientzia hura haren txakurrarekin —Lur du izena— errepikatu nahi izan zuen. Bi urtez ETL ligan parte hartu eta iaz garaipena eskuratu zuten. Hondarribiko probaren irabazlea ere izan zen. «Oso lasterketa azkarra da eta korrika egiteko oso polita». Ama izan berri da eta asteburu honetan irteera lerroan izango diren ala ez erabakitzeke du irundarrak.
Kirol honen filosofia emaitzatik harago doan zerbait dela argi dute biek ala biek. «Garrantzitsuena zure txakurrarekin kirola egitea da, ez hainbeste lehena edo bigarrena geratzea. Bien arteko zerbait da, elkar ulertzea, eta sortzen den loturaz gozatzea. Zure txakurrarekin kirola eta natura elkarbanatzea, hori da gure filosofia», nabarmendu du Varonak.
Olatz Zabala eta Lur iaz Hondarribian.
Batez ere, txakurrek ondo pasatzeko hitzorduak dira antolatzen dituztenak, horregatik, material aproposa erostea eta beren erritmoa errespetatzea ezinbesteko direla gaineratu du Zabalak: «Kirol hau oso polita da, baina txakurraren ongizatea da lehenengo gauza. Berarekin disfrutatu behar da, beraiek dira protagonistak; askotan ikusi izan dugu jabea korrika eta txakurra atzean geratzen zela. Txakurrek jartzen dute erritmoa, eta hori beti errespetatu behar da. Txakurrek ere badauzkate egun onak eta txarrak».
Hortaz gain, tenperatura eta hezetasuna kontuan hartu beharreko faktore garrantzitsuak dira, eta antolatzaileek dagozkien neurriak hartu behar izaten dituzte. Inoiz lasterketaren ibilbidea mozteko edota bertan behera uzteko erabakiak hartzeraino.
Hondarribikoa hitzordu berezia izaten da Zabalarentzat, lasterketa «polita» izateaz gain, ligako azkena ere izaten baita. «Oso giro polita sortzen da. Gure artean elkar ezagutzen dugu, eta baita txakurrek ere, ligan lasterketa asko daudelako. Hondarribikoaren ondoren hilabete asko egoten gara elkar ikusi gabe». Horregatik, lasterketak bukatuta eta sariak banatu ondoren, lunch txiki bat egiten dute, giro ezin hobea sortzeko osagai guztiekin.
Ezinbesteko babesa
Hondarribiko txakurkrosa Ogi Berri-ri esker antolatzen dela nabarmendu du Varonak, eta beraz, eskerrak emateko baliatu du aukera. Aldi berean Euskanikross klubaren babeslea da ere. Klubean hiru modalitateak praktikatzen dituzte eta Jaizkibelgo bideetatik entrenatzen dute.
