Bueltan da Psilocybeko Bertsio Gaba
Bederatzi taldek parte hartuko dute 2025eko Bertsio Gaban. Sarrera doakoa da. Bestetik, Itxeki VLC Fest-en harira egindako elkartasun rifen zozketako irabazleak jakinarazi dituzte.
Larunbat honetan egingo dute Psilocybenea Aretoan fama berezia hartu duen Bertsio Gaba. Arratsaldeko 18:30etan zabalduko dituzte aretoko ateak eta lehen kontzertua 19:00etan hasiko da. Sarrera doakoa izango da.
Bederatzi taldek bereganatuko dute oholtza gauan zehar: Kortatua Bailisakin, Kukunbers, Juanita Retardo, Oink oink oink, Beti Txarrak, Soroetan Pele, La Pota Records, Lehendakaris Tuertos eta Xolomo, Gazta & Piperra taldeek hain zuzen.
Itxeki VLC Fest
Hilaren 4an egin zuten Valentziari elkartasuna adierazteko Itxeki VLC Fest jaialdia. Gau hartan bildutako diru guztia Valentziako musika taldeei bideratuko dietela jakinarazi zion Hitzari Ibai Garzon Psilocybeko kideak abenduan. Sare sozialetan zabaldu dutenez hilabete honen bukaeran osatuko dute dirulaguntzen txostena eta ondoren egingo dute publiko zehazki “nora eta nola” joango den.
Bestetik, elkartasun rifen zozketa egin dute jada. Irabazleak 148, 120, 69, 146 eta 190 zenbakiak izan dira. Saridunak sare sozialen bidez jarri beharko dute elkartearekin harremanetan.
Psilocybe elkarteko kideek eskerrak eman dizkiete jaialdira bertaratu ziren norbanako, musika talde eta laguntzaile guztiei.
