Adinekoentzako erlaxazio tailerra edota telelaguntza hitzaldia
Irungo adinekoentzako hilabete honetako jarduera berezien programa aurkeztu du udalak. Jarduera guztiak doakoak dira.
Adinekoentzako jarduera berezien programa prestatu dute hil honetarako Irungo Udaleko Gizarte Ongizate arloak, Adinekoen Zerbitzuak bultzatuta. Programa hau Irunen erroldatutako 60 urtetik gorako pertsonei zuzendutakoa da eta guztiz doakoak dira.
Egitarauari erreparatuta, erlaxazio tailer bat, telelaguntza hitzaldi bat edota Oiasso Museoan dagoen Martetik Martera erakusketara bisita antolatu dituzte. Bestelako proposamenez gozatzeko aukera ere egongo da, esate baterako, jokoak edota dantzaldiak.
Zinemak ere izango du bere lekua eta Un viaje de diez metros Lasse Hallstrom zuzendariaren pelikula proiektatuko dute. San Migelgo adinekoen gizarte zentroan izango da proiekzioa, hilaren 25ean, 17:00etan. Musika maite duenak Manu Aguilarren kontzertua entzuteko aukera izango du San Migelgo egoitzan ere, hilaren 24an.
Antzerki eta kriskitin erakustaldi bat ikustera txangoa egingo dute Egiluze egoitzara Behobiako adinekoen zentroko erabiltzaileek, hilaren 30ean, 16:00etan.
