‘Hain gertu eta hain urrun’ erakusketa, hilabetez Emeki elkartean
Atzo arratsaldean inauguratu zuten erakusketa Emeki elkarteak Molla ibilbidean duen egoitzan. Parean elkarteko Ainara Lopezek eta Iraitz Arabolaza margolariak eman zituzten xehetasunak.
Parean, feminismoa ardatz, proiektu ezberdinak martxan jartzen dituen Irungo elkartea da, eta atzo arratsaldean Iraitz Arabolazarekin elkarlanean sortu duten Hain gertu eta hain urrun erakusketa inauguratu zuten.
Emakume migratuekin proiektu ezberdinetan “elkar lotu, txirikordatu eta nahastu” direla azaldu zuen atzo Parean elkarteko Ainara Lopezek. Beren bizipenak modu informal batean jasotzen zituzten eta halako batean, gauza guzti horiek kaleratzea polita izango litzatekeela pentsatu zuten.
Proiektua egiteko aldundiari laguntza eskatu eta Iraitz Arabolazarekin harremanetan jarri ziren. Zenbait emakume migraturekin tailerrak egin zituzten. “Hasieran gure ideia zen beraiek beren burua marraztea, eta ariketa hori egin genuen, baina gero nola ikusten zituzten marrazteko eskatu genien. Galdera handia zen”.
Politena, baina, tailerra egin ondorengo hizketaldia zela adierazi zuen Lopezek. Bizipen eta esperientzia horiek guztiak jaso, landu eta erakusketara eraman ditu ondoren Arabolazak. “Erakusketaren izenburuak dioen bezala, askotan ez dugulako beraiek bizitakoa ezagutzen. Horren gertu gaude, baina aldi berean horren urrun”.
Bineta moduan plazaratu ditu Arabolazak bizipen horiek. Marrazki bakoitzak mezu bat helarazten du. Ia testurik gabe ulertzen diren irudiak dira sortu dituenak. Binetek kolore ezberdinak dituzte, kolore bakoitza pertsona ezberdin batena delako. Kolore gorriak, adibidez, haurren bizipenak islatzen ditu, eta kolore laranjak behin eta berriz jasotako bizipenak. “Bizipen batzuk oso puntuala dira, eta beste batzuk orokorrak. Munstro batzuk ikusiko dituzue ere, horiek beldurrak irudikatzen dituzte” zehaztu zuen Arabolazak.
Erakusketa hilabetez izango da ikusgai Emeki elkartean.
