'AMAK' komedia estreinatuko dute etzi Itsas Etxea Auditoriumean
Hilaren 10eko emanaldia Txalo antzerki taldeak egingo du, 20:00etan. Komedia bat da etzi egingo duten antzezlana.
Etzi, hilaren 10ean, Txalo antzerki taldeak AMAK lana estreinatuko du Hondarribiko Itsas Etxea Auditoriumean. Begoña Bilbao da zuzendaria; aktoreak, berriz, Intza Alkain, Tania Fornieles, Oihana Maritorena eta Iraitz Lizarraga.
AMAK ikastola bateko itxaron gelan atera ezinik gelditzen diren lau emakumeen istorioa da. Egoera horrek, ordea, mugarik gabeko ezusteko terapia batera eramango ditu, eta bertan, besteak beste, amatasunaren alde on eta txarrak jorratuko dituzte.
Komedia 20:00etan izango da, eta sarrerak Arma plaza fundazioan, Kutxabanken –online– edo Itsas Etxeko lehiatilan eskuratu behar dira, bi ordu lehenago. 10 euro balio du sarrerak, baina, hemezortzi urtetik beherakoen sarrerek bost euro balio dute.
