Benttu Arrandegiak du Eguberrietako erakusleiho onena
Hilaren 6ra bitarte izango dituzte apaingarriak lehiaketan parte hartu duten hamar saltokiek. Aurten "oso maila ona" izan da.
Domingo Egia kalean dago Benttu Arrandegia. Hondarribiko Udalak antolatutako Eguberrietako Erakusleiho lehiaketan parte hartu eta lehen saria eman diote, sormena, irudi komertziala eta produktuaren aurkezpena bikain uztartzeagatik. Arrandegiak 450 euro jasoko ditu sari gisa.
Bigarren sailkatua San Pedro kaleko Ipotx Goxokidenda izan da eta hirugarrena kale berean dagoen Itxola Garapen eta Zerbitzu Grafikoak denda. Lehenak 300 euro jasoko ditu eta bigarrenak 200. Erakusleihoak urtarrilaren 6ra arte izango dira ikusgai.
Guztira 10 dendek parte hartu dute lehiaketa honetan eta epaimahaikideek adierazi dutenez “oso maila ona” izan da aurtengoan. Higer Optika, Andrea Opariak, Ilaia Ileapaindegia, Xera Estetika, Salón Belleza Babor, Ogi Berri Okindegia eta Boutique Canela izan dira gainontzeko parte hartzaileak.
