Badatoz Amute-Kostako jaiak
Auzo elkarteak bazkari herrikoia eta argazki lehiaketa antolatu ditu jaietarako. Urriaren 5ean izango da bazkaria.
Amute-Kostako jaietarako bazkari herrikoia eta argazki lehiaketa antolatu du auzo elkarteak. Urriaren 5ean izango da bazkaria, eguerdiko 14:00etan. Menua honakoa: Entremesak, paella, salda (umeek makarroiak), eta postrea. Azken honetarako auzotarren kolaborazioa eskatu dute elkartetik. Izan ere, antolatu duten postre lehiaketara aurkezten diren gozoak izango dira dastatuko dituztenak. Ondoren, kafea, kopa eta txanpaina banatuko dituzte. Ogia, ardoa eta ura menuaren barne egongo dira.
Bazkaria amaitutakoan sari banaketa bat egingo dute eta segidan, bingoa hasiko dute. Eguna alaitasunez bukatzeko musika eta dantzaldia antolatu dituzte. Iluntzeko 21:30etan, berriz, gaztetxoen gozamenerako zezen ura irtengo da.
Elkartekoek gogorazi dutenez bazkari herrikoia den heinean guztien laguntza ezinbestekoa izango da bazkaria prestatzeko, banatzeko, jasotzeko… Txartelak gaur eta bihar artean erosi behar dira, arratsaldeko 18:00etatik 20:00etara auzo elkartean. Helduek 12 euro ordaindu beharko dituzte eta haurrek 6 euro. Epez kanpo apuntatu nahi duenak (txartelak geratuko balira) bikoitza ordaindu beharko duela ohartarazi dute. Guztira 220 lagunentzako tokia dago.
Argazki lehiaketa
Urriaren 3an (ostirala) zabalduko dute lehiaketa, arratsaldeko 18:00etan, eta urriaren 6an iluntzeko 21:00etan itxiko dute. Argazki guztiek Amute-Kostako jaiak gaiarekin zerikusia izan beharko dute. Horiek elkartearen Whatsappera bidali beharko dira: 943 57 73 10. Parte hartzaile bakoitzak gehienez 3 argazki aurkeztu beharko ditu eta ezinbestekoa izango da originalak, hau da, argitaratu gabeak izatea. Gainera, argazkiak urriaren 4tik 6ra bitarte ateratakoak izan behar dutela gogorarazi dute.
Urriaren 7an jakingo da irabazlea, elkarteko kideak zuzenean jarriko dira harekin harremanetan.