Nagusilanen bazkari solidarioa, urriaren 5ean
Irabazi asmorik gabeko elkartea da Hondarribiko Nagusilan. Bazkariko sarrerak Kai Alde gozotegian, Batzokian, Done Pedro dendan edo Klink elkartean erosi daitezke.
Irabazi asmorik gabeko elkartea da Hondarribiko Nagusilan, hautatu gabeko bakardadea arintzea eta zahartze aktiboa sustatzea helburu duena. Horretarako hainbat ekintza antolatzen dituzte urte osoan zehar; hala nola, Uliazpi zentroko egoiliarrekin paseoak eman, San Gabriel egoitzako egoiliarrak bisitatu, Betharram egoitzan irakurketa partekatuko tailerrak eskaini, Nagusikleta…
Azken urteetan diruz justu samar ibili direnez, bazkari solidario bat antolatu dute. Urriaren 5ean (larunbata) izango da bazkaria, Klink elkartean. Bazkarian bertan hogei zozketa burutuko dituzte: telebista bat, taladro bat, akuarelak edota lore sorta bat zozketatuko dituzte, besteak beste. Errifak egunean bertan erosi ahal izango dira, edota elkarteak Kasino Zaharrean duen bulegoan. Ordutegia honakoa: astearteetan 11:00etatik 13:00etara.
Bazkariko sarrerak, berriz, bulegoan bertan, Kai Alde gozotegian, Batzokian, Done Pedro dendan edo Klink elkartean erosi daitezke, 25 euroan. Herritar oro dago gonbidatuta.
Bestalde, ekarpenik egin nahi duen orok hurrengo Kutxabank kontura egin dezake: ES05 2095 5039 90 1061338 918 (Klink Elkartea).
