Marea bizien iragarpenen aurrean, prebentzio lanak Hondarribian
Batez ere Mendelu auzoan eta Minasoroeta kalean ari dira lanak egiten azken aldiko gertakariak ekiditeko asmoz.
Datozen egunetarako iragarrita dauden marea bizien aurrean, Hondarribiko Udalak prebentzio lanak abiatu ditu fokua Mendelu auzoan eta Minasoroeta kalean jarriz.
Hondarribian marea biziak izan ziren azken aldian arazoak egon zirela ekarri du gogora udalak, baina oraingoan beharrezko neurriak hartu dituztela ohartarazi dute arazo horiek ekiditeko. Esku hartze horietan Hirigintza saila, udaltzaingoa eta polizia ari dira lanean.
Minasoroeta kalean, esaterako, bizilagunei hesiak eta ura ateratzeko bonbak utzi dizkiete; Mendelu auzoan, berriz, duela aste batzuk jarritako zakuak errebisatu eta egokitu dituzte. Horretaz gain, udaltzaingoa bertako bizilagunekin elkartu da koordinazio lanak burutzeko. Gainera, Bentako aparkaleku inguruetako seinalizazioa indartzen ari dira.
“Udalaren eta herritarren arteko lankidetza ezinbestekoa dela uste dugu halako gertaeren aurrean sor daitezkeen arazoak ahalik eta txikienak izan daitezen”, dio udalak.
