Hondakinen bereizketa hobetu da; baina gehiago hobetu daiteke
Txinzerrek dio herri bazkarian eta txosnetan hondakinen bereizketa hobetu bada ere, hobetu daitekeela jende asko biltzen den lekuetan.
Txingudiko Zerbitzuak-ek Hondarribiko Guadalupeko Ama Birjinaren jaietako garbiketa dispositibo bereziaren balantzen positiboa egin du: “Zerbitzuen kudeaketa arrakastaz egin da, aurreikusitako helburuak betez eta gorabehera garrantzitsurik izan gabe”. Guztira, hilaren 7tik 12ra 195 tona hondakin bildu dituzte: 54 tona materia organiko, 43 tona paper, 33 tona plastiko eta 65 tona errefusa.
Garbiketa operatiboari dagokionez, festetan 145.000 litro ur eta 110 litro xaboi desinfektatzaile erabili dituzte jende gehien ibiltzen den lekuetan garbiketa bermatzeko. Ildo horretatik Leire Zubitur Txingudiko Zerbitzuak-eko gerenteak azpimarratu du gune horietan hondakinak bereizteko erronka izan arren, Gazte Eguneko eta Bentako herri bazkarietan hondakinen kudeaketa hobetu egin dela: “Asko pozten gaitu herritarren aldetik erantzun positiboa jasotzeak, eta Txingudiko Zerbitzuak-ek eskaintzen dituen baliabideak eraginkorrak direla baieztatzeko aukera izan dugu”.
Gainera, txosnek kartoizko edukiontziak behar bezala erabili dituztela azpimarratu du, hauen konpromisoa nabarmenduz: “Txosnek lan handia egin dute kartoizko edukiontziekin, eta horrek asko erraztu du hondakin horiek kudeatzea”. Ontzi arinen edukiontzien kasuan, ordea, bereizketa ez da nahikoa izan. “Oraindik hobetzeko tarte handia dugu, eta guztion artean, urtez urte aurrera egiten jarraitzea espero dugu”. Aurten 20.208 edalontzi banatu ziren Bentako 6 txosnetan, eta horietatik 13.547 berreskuratu dira. “Horrelako ekimenak funtsezkoak dira ingurumenarekiko eragin kaltegarria murrizteko, baina herritarrak kontzientziatzen jarraitu behar dugu, banatutako edalontzien ia % 100 berreskuratu dezagun etorkizun hurbilean”, gaineratu du gerenteak.
Zubiturrek, bestalde, Txinzerren ahalegin etengabea nabarmendu nahi izan du; izan ere, %67an handitu dira baliabide ekonomikoak festetan zehar Hondarribiko kaleak egoera onean mantentzeko.
