Puntu bat sasoia hasteko
Bidasoa Irunek berdinketarekin hasi du 2024-2025 denboraldia. Azken segundoan lortu zuten berdinketa Villa de Arandaren kontra (26-26).
Argazkia: Arcalle. Bidasoa Irunek puntu batekin hasi du 2024-2025 denboraldiko Asobal Liga. Alex Mozasek gidatutako taldeak Aranda de Dueron (Burgos) jokatu zuen atzo Villa de Arandaren kontra, eta azken minutuetan lortu zuen partida berdintzea, etxeko taldea hiru goleko abantailarekin iritsi baitzen azken hiru minutuetara (26-26).
Bidasoarrek bide onetik hasi zuten estreinako neurketa, eta lehen minutuetan hiru goleko errenta lortu zuten. Etxeko taldeak, baina, argi utzi zuen ez zuela amore emango, eta atsedenaldira aurretik iritsi ziren (14-12). Hala ere, Bidasoak lanean gogor jarraitu zuen, eta markagailuan aurretik jartzea ere lortu zuen.
Partida bukatzeko hamaika minutu falta zirenean, Silva kaleratu zuten epaileek txartel gorri batekin, eta Mozasek planak aldatu behar izan zituen. Arandakoak aurretik jarri ziren markagailuan, eta 57. minutuan hiru goleko aldeko errenta lortu zuten. Irundarrek, baina, ez zuten amore eman, eta Iñaki Caverok partida berdindu zuen azken segundoan penalti jaurtiketa bati esker.
Bidasoarrak igandean itzuliko dira lehiara, eta Bartzelona indartsua jasoko dute Artalekun, 20:00etan. Klubak dagoeneko aktibatu du sarreren salmenta.
