Mugitu Bidasoan argazki rallya, hilaren 16tik 22ra
Europako Mugikortasun Astearen barruan antolatu dute, eta gaia garraio arina edo partekatua da.
Zorionekoak dira argazki zaleak, hilaren 16tik 22ra bitartean Mugitu Bidasoan argazki rallya martxan egongo baita. Normalean, egun batekoa izaten da rally formatua, baina kasu honetan zazpi egunekoa izango da, Bidasoa-Txingudi Mugaz Gaindiko Partzuergoa antolatzailea den erabakiz.
Irun, Hondarribia eta Hendaiako udalen koordinazio lanaren emaitza da lehiaketa hau, eta Europako Mugikortasun Astearen barruan programatu dute. Helburua, mugikortasun arina eta partekatua sustatzea da, eta, halaber, muga gaindiko eskualdean, eta parte hartzaileei garraio jasangarri eta muga gaindikoaren esentzia irudietan harrapatzeko aukera eskaini nahi dute.
Parte hartzaileek hiru argazki ahal dituzte bidali, hiri bakoitzeko bat, eta islatuta egon beharko da garraio arina edo partekatua erabiltzea. Argazkiak, consorcio@bidasoaactiva.com helbide elektronikora bidali beharko dituzte. Ez dute esan zein izango den saria, baina berezia izango dela aurreratu dute. Lehiaketaren araudia osoa, Partzuergoaren orrialde ofizialean topa daiteke.
