Hondarribiko Udalak alkatearen adierazpena plazaratu du
Alkatetzaren helburua jaiak eta batez ere irailaren 8a "soseguz eta lasaitasunean" bizitzea dela adierazi eta abuztuaren 22an sinatutako bi dekretuen zehaztasunak eman ditu.
![](https://bidasoa.hitza.eus/site/files/2024/09/alkatearen-adierazpena.jpg)
Hondarribiko Jai Nagusiak hasi baino egun batzuk lehenago, Igor Enparan alkateak adierazpenak egin ditu. Alkatetzaren helburua jaiak eta batez ere irailaren 8a “soseguz eta lasaitasunean” bizitzea dela adierazi eta abuztuaren 22an sinatutako 2024/2329 eta 2024/2337 dekretuen zehaztasunak eman ditu.
“Hondarribiko Alardeko Jaizkibel Konpainiak eta Hondarribiko Alardearen Ondarea Sustatzeko Elkarteak leku eta ordutegi berak eskatzen zituzten eta elkarrizketa saiakera askoren ostean ikusi dugu momentu honetan eragileen arteko akordioa ez dela posible. Lanketa prozesuaren eta erakunde bezala dugun eskumenaren emaitza dira 2024/2329 eta 2024/2337 dekretuak”. Alkateak baietsi duenez, bi dekretuek bateragarri egiten dituzte ekimenak.
Gainera, espazio publikoaren erabileraren banaketa “ahalik eta modu egokienean” egiteko saiakera zintzoa burutu dute udaletik, baina etorkizunean “zuzenagoak izan daitezkeen formula objektiboak finkatzeko saiakera” egin behar dutelaren autokritika egin du.
Azkenik, jai alai, sosegatuak eta parte hartzaileak izateko eskatu du alkateak.