Kamiseta berria aurkeztu du CD Bidasoak
Irungo Oiasso Museoan oinarritutako kamisetak jantziko ditu Bidasoa Irunek datorren denboraldian. Salmentari buruzko informazioa aurki jakinaraziko dute.
Abuztuan sartu berri datorren denboraldiari begira jarri da CD Bidasoa elkartea; izan ere, gaur goizean lehiatzeko erabiliko duten kamiseta berria aurkeztu dute. “Nondik gatozen ez dugu inoiz ahazten” leloari jarraiki, Irungo hiriaren iraganean oinarritutako kamiseta sortu dute. Zehazki Oiasso Museoari egiten dio erreferentzia. Museoa 2006an inauguratu zen, eta hemezortzi urte beteko dituen honetan, omenaldi txiki bat egin nahi izan diote.
Lehen eta bigarren jantzietarako elkarteko koloreak erabili dituzte: urrea eta urdina. Bi kamisetetan antzinako Oiasso hiri erromatarrarek erabiltzen zuten Opus Spicatum -a antzeman daiteke; hau da, harrizko adreilu txikiz osatutako zoladura. Baldosa mota hori museoan bertan dago ikusgai. Mauketan, berriz, garaiko eraikin publikoak apaintzeko erabiltzen zuten irudi erromatarra erantsi dute, eta atzekaldean, klubaren armarria hainbat elementu ezberdinekin nahastuta.
Iñigo Sanz diseinatzaile irundarra izan da diseinuaren arduraduna, eta hornitzaile ofiziala Geff izan da. Datozen asteetan arroparen salmentari buruzko informazioa helaraziko dutela jakinarazi dute.
