Errandoneako depositua berreraikitzeko lanekin hasi dira
Proiektuak uraren kalitatearen gaineko kontrola hobetzeaz gain, ihesak ere ezabatuko dituela diote. Bederatzi hilabetean egingo dute obra.
Txingudiko Zerbitzuak Errandoneako depositua berreraikitzeko lanekin hasi dira. Egungo egitura osorik eraitsi eta hormigoi armatuzko biltegi berri bat eraikiko dute, eta, depositu berriak, balbuleria modernoa eta kontrol zein segurtasun elementuak izango ditu. Horretaz gain, sarreran, mikrotubina bat instalatuko dute energia berriztagarria sortzeko, sartzen den emariaren presioa erregulatuz.
Txingudiko Zerbitzuen arabera, denboraren joanak gabezia batzuk eragin ditu, eta garrantzitsua da horiek berritzea. Bestalde, gehitu dute, azterketa geotekniko eta estruktural sakon baten ondoren erabaki dela depositua berreraikitzea dela konponbide bideragarriena. Proiektu honek uraren kalitatearen gaineko kontrola “nabarmen hobetzeaz” gain, ihesak ezabatuko dituela gaineratu dute, eskualdeko ur horniduraren efizientzia eta jasangarritasuna bultzatuz.
Errandoneako depositua berreraikitzea 2017-2025 Inbertsio Planaren esparruan planifikatutako jarduera multzo baten parte da. 2.236.070 euroko aurrekontua du, eta Urbycolan enpresak gauzatuko du 9 hilabeteko epean.
