Mugikorraren erabileraren gaineko bi saio, adin txikikoen gurasoentzat
Asmoa, seme alabak telefono mugikorrak modu egoki eta arduratsuan erabiltzeko gurasoak trebatzea da. Hilaren 21ean eta 23an izango dira bi saioak.
Adingabeen gurasoak hezkuntza digitalean trebatzeko ikastaro bat eskainiko dute Jon Alonso eta Javier Etxarri Mondragon Unibertsitateko ikasleek. Helburua, gurasoak trebatzea da, euren seme alabak telefono mugikorrak modu egoki eta arduratsuan erabil ditzaten.
Ordu eta erdiko bi prestakuntza saio presentzial eskainiko dituzte. Bata, hilaren 21ean eta bestea hilaren 23an, biak ala biak, 18:00etatik 19:30etara. Palmera Montero gunean dagoen Mondragon Unibertsitatearen egoitzan. Izena emateko lotura honetara jo behar da.
Saio horietan baliabideak eta orientazioa emango dituzte, adin txikikoek teknbologiarekin harreman osasungarri eta segurua izatea sustatzeko. Horrez gainera, guraso kontroleko aplikazio bat instalatzen lagunduko diete.
Formatu teoriko praktikoa izango du eta hainbat gai landuko dituzte. Lehenik, lehen mugikorra eman aurretik adin txikikoaren heldutasunaren ebaluaketa. Etxean, familia unitateko kide guztiek teknologia nola erabiltzen duten aztertuko dute gero. Hirugarrenik, adingabeek erabiltzen dituzten aplikazioak errepasatuko dituzte eta noranzko biko komunikazioa eta teknologia erabiltzeko akordioak sustatzeko jarraibideak emango dituzte.
Guuk telekomunikazio enpresarekin ondu dute proiektu hau, eta prestakuntza saio hauez gain, laguntza zerbitzua eskainiko dute ere Donostian duten dendan (Arrasate kalea 27). Hilaren 27an, 29an eta 31n izango dira horiek.
