'Los peces rojos' filmaren proiekzioa eta solasaldia, asteazkenean
'Los peces rojos' filmaren proiekzioaren eta Xanin Olagibel ardatz duen erakusketaren berri eman du Irungo udalak.
Irungo Udalak antolatuta, datorren asteazkenean, hilak 20, ‘Los peces rojos’ filma emango dute Amaia KZn. Xanin Olagibeli buruzko erakusketaren esparruan emango da filma, Olagibel baita aktoreetako bat.
18 urterekin Parisera joan zen Xanin Olagibel boxeo izar bihurtu nahian, baina gero kirolak Ipar Amerikara eraman zuen, eta bertan hasi zuen Hollywoodeko ibilbidea. 20 urtez borroka librean jardun zuen.
Ildo horretatik, ‘Ringetik Hollywoodera. Irundar ibiltaria’ erakusketa antolatu dute, eta martxoaren 31ra arte egongo da zabalik. Erakusketa biografikoa da, eta igande honetan Olagibeli buruzko erakusketaren azken bisita gidatua egingo du Gurutz Albisu erakusketako komisarioak, gaztelaniaz, Amaia KZn.
Bisita gidatua 12:00etan izango da; filmaren proiekzioa. aldiz, 19:00etan. Azken honetarako sarrera doakoa da, eta emanaldiaren ondoren, mahai ingurua izango da Gurutz Albisurekin.
