Zortzigarren Ribera beka eska daiteke
Profil artistikoko pertsona batek eta ikertzaile profileko batek osatutako tandemek arte garaikideko proiektu bat sortzeko beka da. Otsailaren 2a baino lehen aurkeztu behar dira proposamenak.
Zortzigarren Ribera bekaren aurkezpena egin du gaur Irungo Udalak. Bekak bere identitateari eutsiko dio beste urte batez eta Bidasoa ibaiaren inguru geografikoan ibai eta muga kontzeptuez eta memoria historikoaz hausnartzeko prozesu artistikoen garapena du xede.
Beka orotariko diziplinetan aritzen direnei zuzendutakoa da, hala nola, geografia, soziologia, biologia edota ingurumen zientziak. Horiek Bidasoa ibaiaren gainean eta haren eragin eremuan muga kontzeptuari eta memoria historikoari buruz hausnartzeko ikerketa prozesu bat garatu beharko dute, eta horren emaitza artistikoa behar du izan. Proposamenak jasotzerakoan bereziki alderdi soziala eta partaidetza prozesuak baloratuko ditu epaimahaiak.
Ribera bekak berezitasunen bat baldin badu tandem formatua duela da, hau da, beka jasoko duten pertsona bakoitza izango dela bekaduna, profil artistikokoa eta gizarte zientzietako ikertzailea.
Eskakizunak
Beka eskatu nahi dutenek aurreproiektu bat aurkeztu beharko dute, eta horretan, besteak beste, proiektuaren izenburua, ikerketa kontzeptua, metodologia eta kronograma jaso beharko dituzte. Horrez gain, portfolio formatuan aurkeztu beharko dute proposamen artistikoen memoria.
Beka bakoitzaren zenbatekoa 9.000 eurokoa da eta proiektua egiteko bederatzi hilabete izango dituzte. Proposamenak egiteko epea otsailaren 2ra bitartekoa da eta betiko bideak erabili ahal dira horretarako, HAZ eta egoitza elektronikoa. Oinarri guztiak lotura honetan topa daitezke.
