Hondarribiko babarrunak, lehiaketara
Otsailaren 4an izango da Zumardikoak elkarteak antolaturiko Hondarribiko I. Babarrun txapelketa. Udalerriko 8 baserrik eta 8 elkartek parte hartuko dute.
Zumardikoak elkarteak Hondarribiko I. babarrun txapelketa antolatu du datorren otsailaren 4rako. Txapelketan 8 baserrik eta 8 elkarte gastronomikok parte hartuko dute. Funtzionamendua honakoa izango da: Baserri bakoitzak babarrunak eskainiko dizkio zozketa bidez egokituko zaion elkarteari.
Antolatzaileen esanetan, “Bizi garen lurralde honetan lurrak eskaintzen digun onenaz gozatzeko zortea dugu baserritarren lanari esker. Eta fruitu horietaz konpainiarik onenean gozatzea gustatzen zaigu. Eta zer leku hobea horretarako elkarte gastronomikoak baino, etxean ikasi dugun bezala sukaldatzen dugula familiarentzat eta lagunentzat”.
Hondarribiko Batzokiak ere parte hartuko du lehiaketan eta elkarte guztiei “sakramentuak” eskainiko dizkie. Lehiaketaren ondoren babarrun jana egingo dute Batzokian bertan.
