Txingudi Errugbik maila erakusteko asteburua du aurretik
Bi talde nagusiek, Biok Txingudik eta Zaisa Txingudik sailkapenean gora egiteko baliatuko dituzte asteburuko partidak.
Biok Txingudi Bilbora joango da eta Uni Bilborekin jokatuko du. Taldearen esanetan “Goiko multzoan egoteko prest dagoela erakusteko ordua” iritsi zaie eta horretara joango dira larunbat honetan, 14:15ean hasiko duten partidura, Bilboko Errekalde kiroldegian.
Bizkaitarrak hirugarrenak dira sailkapenean 16 punturekin, 4 partidatan 3 garaipen lortu ostean eta Gaztediren aurka 10-6 galdu zuen jokatutako azken partida.Hala ere, mugakoak lehiatzeko prest daudela erakutsi dute eta play-offeko postuetatik gertu daude, 11 punturekin.
Geroago, 16:00etan, eta Plaiaundin, Zaisa Txingudik Bera Beraren bigarren taldea jasoko du. Joan den astean izandako sentsazio onekin jarraitu nahi dute Iñigo Camareroren mutilek.
Seigarrenak dira beltz-zuriak, donostiarren atzetik, bost punturekin. Prestatzaile irundarraren hitzetan “Bilbon oso ondo jokatu genuen, aurreko partidetan erakutsitako jarrera erabat aldatu genuen eta horrela jarraitu behar dugu, hori baita emaitzak lortzeko modua”.
Klubeko gazteenek ere badute zer egin
Asteburu honetan Txingudiren gazte talde guztiek izango dituzte hitzorduak. Bera Bera- Txingudi 18 urtez azpikoak Donostian jokatuko du larunbatean 14:30ean Elorrio-Arrasateren kontra. Etxekoek ez dute batere erraz izango garaipena lortzea, bizkaitarrak multzoko liderrak direlako.
Txingudi-Baztan 16 urtez azpiko taldeak Gasteiza bidaiatuko du Gaztedi Brekin indarrak neurtzeko. Norgehiagoka 12:00etan izango da, larunbatean ere. Lortutako azkenengo garaipenari jarraipena eman nahi diote Plaiaundikoek.
14 urtez azpiko gazteak, berriz, Plaiaundin arituko dira larunbatean, 11:00etatik aurrera, eta lagunarteko bi partida jokatuko dituzte :Arrasate-Soragazteak eta Eibar-Mutrikuren aurka.
Azkenik, errugbi eskolak Hernanin izango da, igandean 10:30etan. Bertan, etxeko taldeaz gain, Riojaren aurka jokatuko dute.
Txingudiren denda
Berriro martxan jarri dute errugbi taldearen denda. Bertan, kamisetak, motxilak eta bestelako artikuluak erosteko aukera dago. Salgai dagoen material guztia esteka honetan ikusi daiteke: https://www.txingudirugbyclub.eus/es/store
Aritz Arrieta, berriz Euskadiko selekzioaren deialdian
Euskadik Autonomietako Selekzioen Arteko Txapelketako bigarren jardunaldia prestatzeko entrenamendura deitu dute Aritz Arrieta 16 urtez azpiko Txingudiko jokalaria.
