10 Goya hautagaitza jaso ditu 'Bidasoa 2018-2023' dokumentalak
Azaroaren hondarrean iragarriko dituzte izendapenak. Dagoeneko 30 herri eta hirietatik igaro da dokumentala eta aste honetakoa laugarren proiekzio astea du.
Talka Recordsen produzitutako azken lanak, Bidasoa 2018-2023 dokumentalak 10 Goya sari jasotzeko hautagaitza lortu ditu. Azaroaren hondarrean iragarriko du Espainiako Zine Akademiak hamarretik zenbat izendapen izango dituen Fermin Muguruzaren azken lanak.
Jaso dituen hautagaitzak honako hauek izan dira: Pelikula hoberena; zuzendaritza hoberena; gidoi original hoberena; abesti original hoberena; produkzio zuzendaritza hoberena; argazki zuzendaritza hoberena; muntaketa hoberena; soinu hoberena; efektu berezi hoberenak; eta pelikula dokumental hoberena.
Donostiako Zinemalditik eta Mexikoko DocsMX zinemalditik pasa ondoren, urrian izan zen estreinaldi mundiala eta, ordutik, 30 bat herri eta hirietatik igaro da dokumentala. Karteldegian laugarren astea du honakoa eta abenduko proiekzioak zeintzuk izango diren esateko aprobetxatu dute ere.
Hala, Hendaian eta Irunen proiekzio bana egin ondoren, Hondarribira abenduaren 14an iritsiko da, Itsas Etxera hain zuzen ere. Sarrerak aurrerago jarriko dituzte salgai. Azken berrietan adi egoteko, Instagramen kontu bat dauka dokumentalak.
Sinopsia
2018ko udan Frantziak ezarri zituen Pirinio-Atlantikoko Bidasoako muga naturalaren pasagune batzuen kontrola eta itxierak, Europako gainontzeko herrialdeetara igarotzeko etorkinen sarrera eragozteko, 10 hildako eragin zituen urtebetean. Zazpi pertsona hil dira 2021eko apiriletik Irun eta Hendaia arteko Bidasoa ibaiko uretan itota, eta beste hiruk bizia galdu zuten 2021eko urrian, Ziburun tren batek harrapatuta. Dokumental honek, ibaiaren bi aldeetako hainbat ekintzaileri ahotsa eta aurpegia emateaz gain, Harrera Sarea eta Bidasoa elkarteetako ordezkariak, bizia galdu dutenak ere gogoan izango ditu; izena, adina, bidaia eta ametsak, hildako kopuru hotzen atzean dagoen istorioa eta pertsonak ezagutuz, modu honetan tragedia gizatiartuz.
Hendaiako proiekzioak ikusmin handia eragin zuen eta edukiera beteta, ikusle andana kanpoan geratu ziren.
